رووداو دیجیتاڵ
وەزارەتی بەرگریی تورکیا رایگەیاند، لە ئۆپەراسیۆنێکی ئاسمانیدا 24 پێگەی گەریلا و شەڕڤانان بۆردوومانکراون.
بەگوێرەی راگەیێندراوێکی وەزارەتی بەرگریی تورکیا، کاژێر 10:00ی شەو؛ 14-1-2024، ناوچەکانی مەتین، خواکورک، گارە، قەندیل و ئاسۆس لە باشووری کوردستان و چەند ناوچەیەک لە باکووری سووریا و رۆژئاڤای کوردستان بۆردوومانکراون. وەزارەتی بەرگریی تورکیا جەختیکردووەتەوە ئەو 24 شوێنە لەلایەن پارتی کرێکارانی کوردستان (پەکەکە) و یەکینەکانی پاراستنی گەل (یەپەگە) بەکارهێندراون و جەختیشی کردووەتەوە کە لە نێویاندا کۆگەی چەک، ئەشکەوت، پەناگە و وێستگەی بەرهەمهێنانی گازی سروشتی هەن.
ئەمە لەکاتێکدایە کە سەرچاوەیەکی ئاگادار لە سنووری نێوان باشوور و رۆژئاوای کوردستان لە دەڤەری سحێلای سەر بە ناحیەی زوممار بە رووداوی گوت "کەمێک پێش ئێستا (شەوی یەکشەممە، 14-1-2024) تورکیا وێستگەی ستراتیژی بۆ بەرهەمهێنانی کارەبا و گازی لە گوندی سوێدیێ لە سنووری رۆژئاوای کوردستان بۆردوومان کرد."
لەبارەی زیانەکان، ئەو سەرچاوەیە کە داوای کرد ناوی بڵاونەکرێتەوە، رایگەیاند "وێستگەکە نزیکە لە سنووری عێراق و باشووری کوردستان، دەنگێکی زۆر بەهێز هات و هەتاوەکو ئێستاش دەنگی تەقینەوە دێت، بۆیە زیانەکان دیار نین."
دوای هێرشەکان هێزەکانی سووریای دیموکرات (هەسەدە) بڵاویکردەوە کە تورکیا چەندین ناوچەی لە رۆژئاڤای کوردستان و سووریا بۆردومانکردووە. هەسەدە رایگەیاندووە: "لە دوو رۆژی رابردوو تورکیا لەڕێی فڕۆکە و درۆنەکانی وێستگەی وزە، وێستگەی کارەبا، سایلۆ و تیمی بەرگریی شارستانیی کردووەتە ئامانج".
هەسەدە هەروەها رایگەیاندووە، ئامانجی تورکیا ئەوەیە ژیان لە ناوچەکەدا بنەبڕ بکات کە ئەمە جەنگێکی ئاشکرایە لە دژی خەڵکی سڤیل.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ