دەستەی ئامار: ئەمڕۆ ناوی بژمێرانی سەرژمێری رادەگەیێندرێت

 

ئەمڕۆ چوارشەممە، 13 تشرینی دووەم، مەحموود عوسمان، بەڕێوەبەری جێبەجێکاری سەرژمێری لە هەرێمی کوردستان بە تۆڕی میدیایی رووداوی راگەیاند، "وردبینی بۆ تیروپشکی ناوی بژمێران تەواوبووە و ئەمڕۆ ناوی هەموو بژمێران رادەگەیێندرێت."

 

بەڕێوەبەری جێبەجێکاری سەرژمێری لە هەرێمی کوردستان گوتی، "ئەمڕۆ هەموو ئامادەکارییەک دەکرێت و سبەی ئەو کەسانەی ناویان دەرچووە، راهێنانیان دەستپێدەکات و ئامادە دەکرێن بۆ پڕۆسەی سەرژمێری". 

 

زیاتر لە 60 هەزار دەرچووی زانکۆ و پەیمانگەکان ناوی خۆیان لە فۆرمی ئەلیکترۆنی بۆ کارمەندانی سەرژمێری تۆمارکردووە، ئەمە بەپێی ئەو زانیارییانەی مەحموود عوسمان بە رووداوی دان. 

 

نێوەڕاستی هەفتە، گوهدار محەممەد عەلی، بەڕێوەبەری کەرتی تەکنیکی و مەیدانی لە سەرژمێریی هەرێمی کوردستان بە رووداوی گوت، کارمەند بەپێی پێویستی بۆ سەرژمێرییەکە وەرگیراون. "ئەگەری هەیە پێویستمان بە زیاتر لە 17 هەزار کارمەند بێت."

 

4ی تشرینی دووەمی 2024 دەستەی ئاماری هەرێمی کوردستان لە راگەیێندراوێکدا بڵاویکردەوە، ماڵپەڕی پێشکێشکردنی فۆرمی ئەلیکترۆنی رادەگەیێنن و لە رۆژانی 6 و 7 و 8ی ئەم مانگە کارا دەکرێت، ئەوەش بۆ پێشکێشکردنی فۆرمی ئەلیکترۆنی، بەپێی سنووری نیشتەجێبوون لەسەر ئاستی گەڕەک یان گوند.

 

بڕیارە لە 20-11-2024 سەرژمێریی گشتی لە عێراق و هەرێمی کوردستان بکرێت.

 

پرۆسەی ژمارەلێدان و گەمارۆسازیی سەرژمێریی گشتی لە عێراق لە سەرەتای مانگی ئەیلوول دەستیپێکرد و تاوەکو 1ی تشرینی دووەم بەردەوام بوو. لە هەرێمی کوردستانیش لە 01-10-2024 دەستیپێکرد.