پارێزگای هەڵەبجە بۆ خانەنشینان: ئەوەی بایۆمەتری نەکات خۆی بەرپرسە لە مووچەی مانگی نۆ

رۆژی یەکشەممە، 13-10-2024، پارێزگای هەڵەبجە لە ئاگادارینامەیەکدا رایگەیاند: "ئاگاداری هەموو خانەنشینانی مەدەنی و سەربازی و خانەنشینی هێزی 70ی سنووری پارێزگای هەڵەبجە و شارەزوور دەکەین، ئەوانەی UPNیان نییە، لە ماوەی دوو رۆژدا سەردانی بانکی هەڵەبجە و بانکی سەیدسادق بکەن بۆ دروستکردنی UPN."

 

لیوا ئەحمەد لەتیف، لێپرسراوی راگەیاندنی یەکەی 70ـی هێزەکانی پێشمەرگە لەوبارەیەوە بە تۆڕی میدیایی رووداوی راگەیاند: "پێویست بوو کە هەموویان تائێستا بایۆمەتری UPNیان هەبووایە، بەڵام پێویستە لە دوو بۆ سێ رۆژی داهاتوودا هەموو خانەنشینان بایۆمەتری UPNیان کردبێت."

 

پارێزگای هەڵەبجە هۆشداری داوەتە ئەوانەی بایۆمەتری ناکەن و رایگەیاندووە، ئەوانەی سەردان ناکەن، خۆیان بەرپرسن لە مووچەی مانگی 9.

 

داواش لە خانەنشینان دەکات، ئەو پێداویستییەیان پێ بێت:

 

- کارتی نیشتمانی یان ناسنامەی باری شارستانی

- پێناسی خانەنشینی و بارکۆدی بایۆمەتری ئەگەر هەیانبوو.

 

لە راپۆرتێکی هاوبەشی دیوانی چاودێریی دارایی عێراق و هەرێمی کوردستان کە لە 21-7-2024 بۆ نووسینگەی سەرۆکوەزیرانی عێراقیان ناردووە هاتووە: 9730 خانەنیشی پێشمەرگەی یەکەی 70 لە لیستی مووچەدا ناویان تۆمارکراوە، لەو ژمارەیە 2795 کەس بایۆمەتریان نییە. هەروەها 12 هەزار و 698 خانەنیشی پێشمەرگەی کەم ئەندامی و شەهیدانی یەکەی 70 ناویان لە لیستی مووچە تۆمارکراوە، لەو ژمارەیە 6551 کەسیان بایۆمەتریان نییە.