بەربژێرێک: دەربچم بە تۆڕبایینەکەم کێشەی کارەبا چارەسەر دەکەم

 

تاریق محەممەد لە بازنەی هەولێر بەربژێری بزووتنەوەی ئیسلامییە، بە رووداوی گوت: "9 ساڵە سەرقاڵی تۆڕبایینێکم و ئێستا 99٪ـی کارەکانم تەواوکردووە، ئەگەر دەربچم، کێشەی کارەبا لە هەرێمی کوردستان چارەسەر دەکەم."

 

ئەو بەربژێرە لەبارەی تۆڕبایینەکەیەوە دەڵێت: "بەبێ سووتەمەنی و تەنیا بە وزەیەکی کەمی کارەبا کاردەکات، دەتوانێت 100 ئەمپێر کارەبا بۆ یەک مێگاوات زیاد بکات."

 

تاریق محەممەد ئاماژە بەوە دەکات، پڕۆژەکەی دۆستی ژینگەیە و هیچ دەردانێکی ژەهراویی نییە "ئەگەر دەریش نەچم، واز لە بیرۆکەکەم ناهێنم."

 

ئەو بەربژێرەی بزووتنەوەی ئیسلامیی کوردستان باسی لەوە کرد، پڕۆژەی دیکەیشی هەیە کە یەکێکیان دروستکردنی ژووری ساونایە: "ژوورێکی هەڵمیم دروستکردووە بۆ ساونا کە پێویستی بە کارەبا نییە و تەنیا بە کەمێک گازی شل کار دەکات و تێچووەکەی تەنیا 200 دۆلارە."