رووداو دیجیتاڵ
نێچيرڤان بارزانى، سه‌رۆكى هه‌رێمى كوردستان، پێشوازى له ئەلێکساندەر شۆڵنبێرگ، وه‌زيرى ده‌ره‌وه‌ى نه‌مسا و شاندێكى ياوه‌رى كرد. سەرۆکی هەرێمی کوردستان داوای لە وەزیری دەرەوەی نەمسا کردووە نوێنه‌رايه‌تييه‌ك له هه‌رێمى كوردستان بكه‌نه‌وه و، وەزیری دەرەوەی نەمساش ئامادەیی دەربڕیوە بۆ پەرەپێدانی پەیوەندییەکانیان و هێنانی وەبەرهێنەرانی وڵاتەکەیان لە هەرێمی کوردستان.
كۆبوونه‌وه‌کە بەیانیی ئەمڕۆ چوارشەممە، 13-9-2023 لە هەولێر بەڕێوەچوو کە جێگرانى سه‌رۆك و به‌رپرسى فه‌رمانگه‌ى په‌يوه‌نديیه‌كانى ده‌ره‌وه‌ى هه‌رێمى كوردستان و نوێنه‌رى حكومه‌تى هه‌رێمى كوردستان له نه‌مسا ئاماده‌ى بوون. لە کۆبوونەوەکەدا په‌يوه‌ندييه‌كانى نه‌مسا له‌گه‌ڵ عێراق و هه‌رێمى كوردستان، په‌يوه‌ندييه‌كانى هه‌ولێر ـ به‌غدا، كۆچى ناياسايى بۆ ئه‌وروپا و دوايين پێشهاته‌كانى ناوچه‌كه به‌گشتى، تاوتوێكران.
وێنەی پێشوازیی نێچیرڤان بارزانی، سەرۆکی هەرێمی کوردستان لە ئەلێکساندەر شاڵنێرگ، وەزیری دەرەوەی نەمسا. pic.twitter.com/rmkMlaTRFA
— Rudaw (@Rudawkurdish) September 13, 2023
لە راگەیێندراوەکەی سەرۆکایەتیی هەرێمی کوردستاندا هاتووە، "سەرۆک نێچيرڤان بارزانى وێراى ئاماژه‌دان به په‌يوه‌نديى له مێژینه‌ى هه‌ردوولا و ستايشى پشتگيريى نه‌مسا له هه‌رێمى كوردستان و به‌رده‌واميى گه‌شتيى راسته‌وخۆى ئاسمانيى ڤيه‌ننا ـ هه‌ولێر، پيرۆزبايى و ده‌ستخۆشى له وه‌زيرى ده‌ره‌وه‌ى نه‌مسا كرد بۆ دووباره كردنه‌وه‌ى باڵيۆزخانه‌ى وڵاته‌كه‌يان له به‌غدا و داواى كرد نوێنه‌رايه‌تييه‌ك له هه‌رێمى كوردستان بكه‌نه‌وه، هه‌روه‌ها ئاماده‌يى هه‌رێمى كوردستانى بۆ بره‌ودان به په‌يوه‌ندييه‌كانى له‌گه‌ڵ نه‌مسا له هه‌موو بواره‌كاندا دووپات كرده‌وه."
وه‌زيرى ده‌ره‌وه‌ى نه‌مسا جەختی لەوە کردەوە كه وڵاته‌كه‌ى به بايه‌خه‌وه له په‌يوه‌ندييه‌كانى له‌گه‌ڵ عێراق و هه‌رێمى كوردستان ده‌ڕوانێت و كار بۆ ئه‌وه ده‌كه‌ن نوێنه‌رايه‌تييه‌ك له هه‌ولێر بكه‌نه‌وه، "هه‌روه‌ها جه‌ختى له‌وه كرده‌وه كه كه‌رتى تايبه‌تى نه‌مسايى خوازياره وه‌به‌رهێنان له هه‌رێمى كوردستان بكات. له‌مباره‌يه‌وه هه‌ردوولا هاوڕابوون كه سه‌قامگيريى سياسى و ئه‌منى گرنگه بۆ راكێشانى سه‌رمايه‌گوزاريى بيانى و پێشكه‌وتنى ئابوورى."
ڤیدیۆی ساتی پێشوازیی نێچیرڤان بارزانی، سەرۆکی هەرێمی کوردستان لە ئەلێکساندەر شاڵنێرگ، وەزیری دەرەوەی نەمسا لە هەولێر. pic.twitter.com/jt6YENI095
— Rudaw (@Rudawkurdish) September 13, 2023
لەبارەی كۆچى ناياساييش، هه‌ردوولا داكۆكييان له‌وه كرده‌وه كه بۆ رووبه‌ڕووبوونه‌وه‌ى كۆچى نایاسایی، ده‌بێ هاوئاهەنگیی هه‌مه‌لايه‌نه له‌نێوان وڵاتانى ئه‌وروپا و ناوچه‌كه‌دا هه‌بێت.
سه‌باره‌ت به كێشه‌كانى هه‌ولێر ـ به‌غدا، نێچيرڤان بارزانى دووپاتى كرده‌وه "ده‌بێ كێشه‌كان له‌سه‌ر بنه‌ماى ده‌ستوور چاره‌سه‌ر بكرێن و سيستمى فيدراڵى به ته‌واوى جێگير ببێت، بۆ ئه‌و مه‌به‌سته‌ش گفتوگۆيه‌كى بنياتنه‌ر له‌سه‌ر بنه‌ماى لێكگه‌يشتنى هاوبه‌ش بۆ چاره‌سه‌ر و تێپه‌ڕاندنى كێشه‌كان، به‌ڕێوه‌بچێت. هه‌روه‌ها جه‌ختی له په‌يوه‌نديى دراوسێيه‌تيى باش له‌گه‌ڵ وڵاتانى دراوسێ و پاراستنى به‌رژه‌وه‌نديى هاوبه‌ش كرده‌وه."
شەوی رابردوو شۆڵنبێرگ لە بەغداوە گەیشتە هەرێمی کوردستان و لە فڕۆکەخانەی نێودەوڵەتیی هەولێرەوە پێشوازی لێکرا. وەزیری دەرەوەی نەمسا جگە لە کۆبوونەوە لەگەڵ نێچیرڤان بارزانی، بەجیا لەگەڵ سەرۆک بارزانی و مەسرور بارزانی، سەرۆکوەزیران کۆبووەوە و بڕیارە لەگەڵ قوباد تاڵەبانی، جێگری سەرۆکوەزیرانیش کۆببێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ