ئەلکساندەر شاڵنبێرگ، وەزیری دەرەوەی نەمسا
رووداو دیجیتاڵ
وەزیری دەرەوەی نەمسا چووە بازاڕی قەیسەریی هەولێر و لەوێ کەبابی هەولێری خوارد. ئەمە دووەمجارە ئەو بەرپرسە باڵایەی نەمسا سەردانی پایتەختی هەرێمی کوردستان دەکات و لەگەڵ بەرپرسان لە بازاڕدا دەسووڕێتەوە.
ئەلکساندەر شاڵنبێرگ، وەزیری دەرەوەی نەمسا گوتی، "[کەبابەکە] زۆر خۆش بوو، بەشێکی جوانی ئەم سەردانەم بوو. ئەمە یەکەمجارم نییە سەردانی هەولێر بکەم، بەڵام دەبێت ئەوە بڵێم کە سەردانەکەم بۆ عێراق و بەغدا و ئەمڕۆ بۆ هەولێر، لەگەڵ شاندە بازرگانییەکانی نەمسا، سەرکەتووە بووە".
وه‌زيرى ده‌ره‌وه‌ى نه‌مسا، شەوی 12ی ئەیلوول گەیشتە هەولێر و ئەمڕۆش لەگەڵ هەریەک لە سەرۆک مەسعود بارزانی، نێچیرڤانی بارزانی، سەرۆکی هەرێمی کوردستان و مەسرور بارزانی، سەرۆکی حکومەتی هەرێمی کوردستان کۆبووەوە.
ئەلکساندەر شاڵنبێرگ گوتی، "بە دڵنیاییەوە ئەگەر پێشکەوتن و بەرەوپێشچوون بەردەوام بێت بەم رێچکەیەی کە ئێستا هەیە، بۆچی گەشتیار نەیێتە وڵاتەکەتان؟ هەموو کەسێك تاڕادەیەک شارەزایی لەسەر ئەم ناوچەیە هەیە، بەڵام بۆ ئەوەی گەشتیار بێن پێویستت بە سەقامگیری و ئاسایشە و دەبێت کار لەسەر ئەوە بکەین".
شاندەکەی نەمسا بێجگە لە وەزیری دەرەوە، نوێنەرانی 10 کۆمپانیای گەورەی نەمسای تێدا بووە بەمەبەستی دۆزینەوەی هەلی وەبەرهێنان لە هەرێمی کوردستان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ