کوردستان
دیمەنێکی خۆپێشاندانەکەی تورکمان و عەرەبەکان لەبەردەم باڵەخانەی ئەنجوومەنی پارێزگای کەرکووکدا. وێنە: رووداو
prev
next
رووداو دیجیتاڵ
سەرۆکی بەرەی تورکمانیی عێراق دەڵێت، پێکهاتەیەک و نیوەی پێکهاتەیەکی دیکە لە پێکهێنانی حکومەتی خۆجێیی کەرکووکدا پەراوێز خراون. سەرۆکی هاوپەیمانیی عەرەبیش لە کەرکووک داوای دەستوەردانی سەرۆکوەزیرانی عێراق دەکات و دەڵێت، ئەوەی رۆژی 10ی مانگ لە بەغدا کرا "نایاسایی" بوو.
ئێوارەی ئەمڕۆ سێشەممە 13-08-2024 بەشێک لە تورکمان و عەرەبی کەرکووک لەبەردەم باڵەخانەی پارێزگای کەرکووک گردبوونەوە، ئەوەش وەکو ناڕەزاییەک لە کۆبوونەوەی ئەنجوومەنی پارێزگای کەرکووک تایبەت بە هەڵبژاردنی پارێزگار و سەرۆکی ئەنجوومەن.
حەسەن تۆران، سەرۆکی بەرەی تورکمانیی عێراقی گوتارێکی پێشکێش کرد و گوتی، لە حکومەتی خۆجێیی ئێستای کەرکووکدا "پێکهاتەیەک و نیوەی پێکهاتەیەکی دیکە پەراوێزخراون. ئەمە ناسرووشتییە و قبووڵکراو نییە. پێویستە ئەوانەی ئەو بڕیارە هەڵەیان داوە، پاشگەز ببنەوە."
بەرەی تورکمانیی عێراق لە ئەنجوومەنی پارێزگای کەرکووک خاوەنی 2 کورسییە لە 16 کورسییەکە و حەسەن تۆران گوتی، "ئێمە پەنامان بۆ دادگە بردووە و متمانەمان بە دادگەی عێراق هەیە. سکاڵامان پێشکێش کردووە و بەردەوام دەبین لە بەدواداچوون بۆ سکاڵاکەمان لە دادگەی باڵای فیدراڵی، دادگەی عێراقی و دادگەی کارگێڕی تاوەکو مافەکانمان بەدەست دەهێنین."
بێ بەشداریی پارتی دیموکراتی کوردستان، بەرەی تورکمانی و بەشێکی عەرەبی ئەنجوومەنی پارێزگای کەرکووک، شەوی 10ـی ئەم مانگە لە کۆبوونەوەیەکدا لە بەغدا، رێبوار تەها بە پارێزگار و محەممەد حافز بە سەرۆکی ئەنجوومەنی پارێزگای کەرکووک هەڵبژێردران.
هەر لە گردبوونەوەکەدا راکان جبووری، سەرۆکی هاوپەیمانیی عەرەبی لە کەرکووک کە هاوپەیمانییەکە خاوەنی 3 کورسییە لە ئەنجوومەنی پارێزگای کەرکووک قسەی کرد و گوتی، "ئێمە وەک تورکمان و هاوپەیمانیی عەرەبی و حیزبی سیادە دووپاتی دەکەینەوە، لەسەرەتاوە هەڵوێستمان جێگیر بووە و هەر بە جێگیریش دەمێنێتەوە. پەنا بۆ دادگە دەبەین بۆ پاراستنی مافەکانمان."
راکان جبووری گوتی، "من سەرۆکی تەمەنم و هەر دانیشتنێک سەرۆکی تەمەن سەرپەرشتی نەکات، دانیشتنێکی نایاساییە. ئەوەی روویدا نایاسایی بوو."
راکان جبووری ئاماژەی بەوەشکرد، "داوا لە بەڕێز سەرۆکوەزیران دەکەین دەستوەردان بکات بۆ پاراستنی ئاسایش و ئاشتی کۆمەڵایەتی لە کەرکووک و دۆخەکە بگەڕێندرێتەوە بۆ رێچکەی یاسایی خۆی. دەبێت کۆبوونەوەی ئەنجوومەنی پارێزگا دوای رێککەوتن و سازان بکرێت، ئەویش بەپێی مادەی 13 بە سەرۆکایەتیی سەرۆکی تەمەن کە هەمووان رەزامەندبن لەبارەیەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ