رووداو دیجیتاڵ
خانمە هونەرمەندی کورد سۆها فەتحی، لەکاتی هەوڵدانی بۆ پەڕینەوە لە تورکیاوە بۆ یۆنان لەلایەن هێزە ئەمنیەکانی تورکیاوە دەستگیرکراوە و حکومەتی ئەو وڵاتە بڕیاریداوە دیپۆرتی ئێرانی بکاتەوە. کەسێکی نزیکی سۆهاش دەڵێت "ئەگەر دیپۆرت بکرێتەوە، کۆماری ئیسلامی ئێران سزایەکی سەختی دەدەن".
رۆژی شەممە، 13-05-2023 سەردار وەڵەدبەگی، کەسی نزیکی بنەماڵەی سۆها فەتحی بە رووداوی گوت، "سۆها و میلاد یادگاریی هاوژینی، هەفتەیەک بەرلەئێستا لە خاکی تورکیا و نزیک خاکی یۆنان لەلایەن هێزێکی تورکیاوە دەستگیرکراون و ئیستا لە کامپێکی شاری وان راگیراون".
سەردار وەڵەدبەگی گوتی "هەرچەندە سۆها هونەرمەندە، بەڵام وەکو چالاکڤانی سیاسی و مرۆیی زۆر کارا بووە، بەتایبەت لە کاتی خۆپیشاندانەکانی ئێران و رۆژهەڵاتی کوردستان لەدوای کوژرانی ژینا ئەمینی، بۆیە ئەگەر دیپۆرت بکرێتەوە، بە دڵنیاییەوە ژیانی دەکەوێتە مەترسییەوە".
وەڵەدبەگی داوا لە رێکخراوەکانی کۆمەڵگەی مەدەنی و هەموو چالاکڤانان دەکات، گوشار بخەنە سەر حکومەتی تورکیا بۆ ئەوەی بڕیاری دیپۆرتکردنەوەی سۆها فەتحی هەڵوەشێنێتەوە.
بەهار فەتحی، کە ناوە هونەرییەکەی سۆها-یە، لە گوندی نەوسوودی سنووری پاوە لە رۆژهەڵاتی کوردستان لەدایکبووە، چەند ساڵێک لە باشووری کوردستان ژیاوە و نزیکەی دوو ساڵە لەگەڵ میلاد یادگاری ژیانی هاوژینییان پێکهێناوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ