رووداو دیجیتاڵ
سەرۆکوەزیرانی هەرێمی کوردستان پێشوازی لە شاندێکی کۆنگرێسی ئەمریکا کرد و هەردوولا جەختیان لەوە کردەوە "کابینەی نوێی حکومەتی هەرێمی کوردستان لە زووترین کاتدا" پێکبهێنرێت.
شاندەکەی کۆنگرێسی ئەمریکا پێکهاتبوون لە ئەندامانی کۆنگرێس ئادەم سمیس، مایکل باومگارتنەر، سارا جاکۆبس، وێسلی بێڵ، جۆرج وایتسایدز و چەند کەسێکی دیکەی یاوەریان.
حکومەتی هەرێمی کوردستان دەڵێت، "لە کۆبوونەوەکەدا بیروڕا لەبارەی دۆخی گشتیی عێراق و ناوچە و پەرەپێدانی زیاتری پەیوەندییەکانی هەرێمی کوردستان و ئەمریکا ئاڵوگۆڕ کرا".
شاندەکەی کۆنگرێس، "ئاماژەیان بە پێگەی گرنگی هەرێمی کوردستان لە عێراق و ناوچەکە کرد و پشتیوانیی ئەمریکایان بۆ هەرێمی کوردستان دووپات کردەوە".
لای خۆیەوە، مەسرور بارزانی "سوپاس و پێزانینی هەرێمی کوردستانی بۆ هاوکاری و پشتگیریی بەردەوامیی ویلایەتە یەکگرتووەکانی ئەمریکا دەربڕی. هەروەها تیشکی خستەسەر چاکسازییەکانی حکومەتی هەرێمی کوردستان لە بوارەکانی وزە و کارەبا و سیستمی بانکی".
لە بەشێکی دیکەی گفتوگۆکاندا، وەکو لە راگەیێندراوەکەی حکومەتدا هاتووە، "هەردوولا جەختیان لە پێویستیی پێکهێنانی کابینەی نوێی حکومەتی هەرێمی کوردستان لە زووترین کاتدا کردەوە".
پەیوەندییەکانی هەرێمی کوردستان و حکومەتی فیدراڵ، گرنگیی دەستپێکردنەوەی هەناردەکردنی نەوتی هەرێمی کوردستان، هەروەها گۆڕانکارییەکانی سووریا و پرۆسەی ئاشتی لە تورکیا، چەند تەوەرێکی دیکەی گفتوگۆکانی کۆبوونەوەکە بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ