رووداو دیجیتاڵ
پارتی کرێکارانی کوردستان (پەکەکە) دەڵێت، هەرچەندە ئاگربەستی تاکلایەنەیان بۆ سەرخستنی پرۆسەی ئاشتی راگەیاندووە، بەڵام سوپای تورکیا لە پێنج رۆژدا هەزار و 26 جار پێگەکانیانی لە هەرێمی کوردستان بۆردوومان کردووە.
ناوەندی چاپەمەنی و راگەیاندنی هێزەکانی پاراستنی گەل (هەپەگە)، باڵی سەربازیی پەکەکە، لە نوێترین راگەیێندراویدا دەڵێت، سەرەڕای پابەندبوونیان بەو ئاگربەستەی زیاتر لە مانگێکە رایانگەیاندووە، هێزەکانی سوپای تورکیا لە هێرشەکانیان بەردەوامن.
هەپەگە دەڵێت، لە رۆژانی 7-12ـی نیسانی 2025دا سوپای تورکیا بە درۆن، فڕۆکەی جەنگی، هاوەن و تۆپهاوێژ هەزار و 26 جار پێگەکانیانی لە ناوچە جیاوازەکانی زاپ، گارە، مەتین، شێلادزێ، کانی ماسێ، ئاڤاشین و ئامێدی بۆردوومان و تۆپباران کردووە و لە ئەنجامدا دوو گەریلا گیانیان لە دەستداوە.
هەپەگە دەڵێت، هەرچەندە ئاگربەستیان راگەیاندووە، بەڵام لە رۆژانی 9 و 10 و 12ـی مانگدا لە ناوچەکانی شێلادزێ، زاب و مەتین ناچاربوون وەڵامی سێ هێرشی راستەوخۆ بدەنەوە.
10ـی نیسانی 2025، لیوا زەکی ئاکتورک، راوێژکاری راگەیاندنی وەزارەتی بەرگریی تورکیا لە کۆنفرانسی رۆژنامەڤانیی هەفتانەیدا رایگەیاند، لە هەفتەیەکدا و لە ئەنجامی هێرشەکانی سوپای وڵاتەکەی لە باشووری کوردستان و رۆژئاوای کوردستان، 18 گەریلا و شەڕڤان گیانیان لەدەستداوە کە 6 گەریلا و 12 شەڕڤان بوون.
دوای پەیامەکەی عەبدوڵڵا ئۆجەلان کە رۆژی 27ـی شوباتی 2025 بڵاوکرایەوە و تێیدا داوای چەکدانان و هەڵوەشاندنەوەی پەکەکەی کرد، هەپەگە رۆژی 1ـی ئاداری 2025 ئاگربەستی تاکلایەنەی راگەیاند.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ