دوای بەدواداچوونێکی رووداو، وەزارەتی ناوخۆ چەند بڕیارێکی لەبارەی ماتۆڕسکیلەکان دەرکرد

 

ئەمڕۆ پێنجشەممە، 13ـی شوباتی 2025، وەزارەتی ناوخۆی حکومەتی هەرێمی کوردستان، چەند بڕیارێکی لەبارەی کۆمپانیاکانی گەیاندنی خواردن و کارکردنی ماتۆڕسوارەکان دەرکرد.

 

لە بڕیارەکانی وەزارەتی ناوخۆدا هاتووە، ئەو ماتۆڕانەی لە ماوەی رابردوو بێ تابلۆ و تۆمارکردن لەلای كۆمپانیاكانی دلیڤەری کاریان کردووە و سەرپێچی یاساکانی هاتووچۆیان کردووە و سزای داراییان هاتووەتە سەر، بە ناسینەوەی لۆگۆی تایبەت بە کۆمپانیاکان، بەرپرسیارێتیی کەمتەرخەمی دەکەوێتە ئەستۆی کۆمپانیاکان.

 

بڕیارەکانی وەزارەتی ناوخۆ دوای بەدواداچوون و هەواڵی تۆڕی میدیایی رووداو هات لەسەر ئەو حاڵەتە.

 

رووداو لە بەدواداچوونەکانیدا تیشکی خستەسەر ئەوەی، نەبەستنی کەلوپەلی سەلامەتی و خۆپاراستن لەلایەن ماتۆڕسوارەکان، جێبەجێنەکردنی یاسا و رێنوێنییەکانی هاتووچۆ، دەنگی زۆر و بە قاچاخ هاوردەکردنیان نیشانە سەرەکییەکانی کێشەی ماتۆڕسکیلەکانن لە هەرێمی کوردستان. 

 

 

یەكەم: پێویستە ماتۆڕسوارانی گەیاندنی خواردن، ماتۆڕەکانیان لە بەڕێوەبەرایەتیی هاتووچۆی هەولێر تۆمار بکەن و مۆڵەتی ماتۆڕسواری دەربهێنن، هاوکات هەر ماتۆڕسوارێک مەرجی سەلامەتی نەبێت، نابێت کۆمپانیا دەرفەتی کاری پێبدات، بە پێچەوانەوە کۆمپانیا بەرپرسیار دەبێت، سەرپێچی سزا داراییەکانی ماتۆڕی نەناسراویش دەکەوێتە ئەستۆی کۆمپانیا.

 

دووەم: ئەو ماتۆڕانەی لە ماوەی رابردوو بێ تابلۆ و تۆمارکردن لەلای كۆمپانیاكانی دلیڤەری کاریان کردووە و سەرپێچی یاساکانی هاتووچۆیان کردووە و سزای داراییان هاتووەتە سەر، بە ناسینەوەی لۆگۆی تایبەت بە کۆمپانیاکان، بەرپرسیارێتی کەمتەرخەمی دەکەوێتە ئەستۆی کۆمپانیاکان. دەكرێت كۆمپانیاكان بەشێوەی قیست سزای دارایی سەرپێچییەكانی ماتۆڕسوارەكانیان بدەن لەماوەیەک كە درێژتر نەبێت لە 31- 12- 2025، سوودمەندیش دەبن لە بڕیاری رێژەی داشكاندنی پێبژاردنەكان كە لە بەڕێوەبەرایەتی هاتووچۆ دەرچووە، بە پێچەوانەوە لە دوای ئەو رێکكەوتە واتە لە ساڵی نوێی 2026، کۆمپانیاتان رووبەڕووی لێپرسینەوە یاسایی و راگرتنی کارەکان دەکرێت.

 

سێیەم: كۆمپانیاكانتان پێویستە پابەندبن بە رەخساندنی دەرفەتی كار بۆ هاووڵاتییانی هەرێمی كوردستان و پێشینەیی بدرێت بە هاووڵاتییان بە گوێرەی بڕیار 172ـی ئەنجوومەنی وەزیران، هەر بیانییەك لەلاتان كاری گەیاندنی خواردن بكات پێویستە کارتی نشینگەی (بەسەرنەچوو) هەرێمی كوردستان هەبێت و مۆڵەتی ماتۆڕسواری هەبێت، هەروەها پێویستە ئەوانەی خواردن دەگوزانەوە بۆ ماڵان لە لایەنی ئەمنی و پاشخانی تاوان بەڵگەنامەی بێتاوانی پێشكەشتان بكەن و لەناو دۆسیەیان پارێزراو بێت، بەپێچەوانەوە كۆمپانیا بەرپرسیارێتیی یاسایی هەڵدەگرێت.

 

چوارەم: بۆ رەچاوكردنی میزاجی گشتیی هاووڵاتییان و پارێزگاری كردن لە ژینگە، پێویستە هەوڵ بدرێت بۆ گەیاندنی خواردنی دلیڤەری بۆ گەڕەكەكانی ناوشار، ماتۆڕی كارەبایی و بێ دەنگ بەكاربهێندرێت و بە گشتیش ماتۆڕەكان پێویستە لە رووی دەنگەوە بێزاركەر نەبێ.

 

پێنجەم: بۆ سەلامەتی گیانی خۆیان، پێویستە ماتۆڕسكیلەكان پابەندبن بە لەسەركردنی كڵاو و پۆشینی جلوبەرگی تایبەت، لەبەر بارودۆخی ئەمنی، هەر كۆمپانیایەک پێویستە جلوبەرگی تایبەت بەخۆی هەبێت و تەنیا ئەو ماتۆڕسكیلانەی كار لەگەڵ ئەو كۆمپانیایە دەكەن، دەستیان بگاتە كڕینی ئەو جلوبەرگە و باجی تایبەت بەخۆیان لە یەخەیان بدەن كە ناوی سیانی و كۆدی كاركردنی كۆمپانیای تیا نووسرابێت، هەروەها دەبێت ماتۆڕسكیلەکان پابەندی یاسا و رێساكانی لێخوڕینی سەلامەتی و رێگەوبان بن.