رووداو دیجیتاڵ
گوتەبێژی وەزارەتی خوێندنی باڵا دەڵێت، نەخشەرێگەیەکیان بۆ بەرەنگاربوونەوەی مادەی هۆشبەر ئامادەکردووە و کۆتایی ئەم مانگە گفتوگۆی کۆتایی لەسەر دەکرێت و دەدرێتە ئەنجوومەنی وەزیران.
رۆژی سێشەممە 13ـی شوباتی 2024 عەباس ئەکرەم، گوتەبێژی وەزارەتی خوێندنی باڵا و توێژینەوەی زانستی بە تۆڕی میدیایی رووداوی راگەیاند، "وەزارەتی خوێندنی باڵا نەخشەڕێگەیەکی هەمەلایەنەی سەبارەت بە بڵاوکردنەوەى هۆشیارى لەنێو کۆمەڵگە و زیانى مادە هۆشبەرەکان و کارتێکەرە عەقڵییەکان ئامادە کردووە".
گوتیشی، "ئەمڕۆ بە سەرپەرشتى هەریەک لە د. ئارام محەممەد قادر، وەزیرى خوێندنى باڵا و توێژینەوەى زانستى و دکتۆر سامان بەرزنجى، وەزیرى تەندروستى، کۆبوونەوەى هاوبەشى هەردوو وەزارەت لەبارەى هەوڵەکان بۆ بەرەنگاربوونەوەى مادە هۆشبەرەکان ئەنجامدرا".
بەگوێرەی راگەیێندراوی وەزارەتی خوێندنی باڵا و توێژینەوەی زانستی، د. ئارام محەممەد ئاماژەی بە نەخشەڕێگەیەک کردووە کە پاڵپشت بە یاساى بەرەنگاربوونەوەى مادە هۆشبەرەکان ئامادەکراوه و لە کۆتايى ئەم مانگەشدا لە دیدارێکى هاوبەشى فراواندا گفتوگۆى زیاترى لەبارەوە دەکرێت.
عەباس ئەکرەم دەڵێت، ئامانجی ئەو دیدارە بۆ ئەنجامدانی دیالۆگێکى بەرفراوانە لەنێوان دامەزراوەکان و زانکۆکانى کوردستان و دەشڵێت، "بۆ ئەوەیە زانکۆکانمان بەشداريى کارا بکەن لە ئامادەکردنی ستراتیژێک بۆ بەرەنگاربوونەوەى مادە هۆشبەرەکان و ئەو مەترسییانەى لەسەر وڵات و هەرێمەکەمان لە بڵاوبوونەوەى مادە هۆشبەرەکان و کارتێکەرە عەقڵییەکان هەیە".
بڕیارە رۆژی 26ـی ئەم مانگە وەزارەتی خوێندنی باڵا و توێژینەوەی زانستی لە هەولێر دیدارێک بۆ گفتوگۆکردن لەبارەی نەخشەڕێگەکەی بکات و گوتەبێژی وەزارەتەکە دەڵێت، "لەو دیدارە هاوبەشەدا گفتوگۆی فراوان لەبارەی نەخشەڕێگەی وەزارەت دەکرێت و دوای رەچاوکردنی سەرجەم تێبینییەکان، رەوانەی ئەنجوومەنی وەزیرانی دەکەین بۆ ئەوەی پەسند بکرێت".
چەند ساڵێکە بازرگانان و بەکارهێنەرانی مادەی هۆشبەر لە هەرێمی کوردستان زیادیان کردووە.
رۆژی 07-02-2024، ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە تۆڕی میدیایی رووداوی راگەیاند، پار 1168 بازرگان و بەکارهێنەری مادەی هۆشبەر لەنێو چاکسازییەکاندا بوون، ئەم ساڵ تاوەکو 1ـی ئەم مانگە ئەو ژمارەیە بۆ 1214 کەس زیادی کردووە؛ گوتیشی، لەو ژمارەیە 676 کەسیان بەکارهێنەری مادەی هۆشبەرن و 538 کەسیش بازرگانی مادەی هۆشبەرن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ