سەرۆکی هەرێمی کوردستان و وەزیری بەرگریی ئەڵمانیا لەکۆبوونەوەدان

 

ئاڵا شاڵی، پەیامنێری رووداو لە هەولێرەوە گوتی "کۆبوونەوە نێچیرڤان بارزانی، سەرۆکی هەرێمی کوردستان و بۆریس پیستۆریەس، وەزیری بەرگریی ئەڵمانیا دەستیپێکرد."

 

وەزیری بەرگریی ئەڵمانیا لە گەشتێکی دوو رۆژەیدا بۆ رۆژهەڵاتی نێوەڕاست، سەردانی عەممان و بەغدای کرد، ئەمڕۆش گەیشتە هەولێر و لەگەڵ بەرپرسانی باڵای هەرێمی کوردستان کۆدەبێتەوە. 

 

پێش ئەوەی بێتە هەولێر، بۆریس پیستۆریەس رۆژی چوارشەممە (11ـی کانوونی یەکەمی 2024) لە بەغدا لەگەڵ محەممەد شیاع سوودانی، سەرۆکوەزیرانی عێراق و هاوتا عێراقییەکەی سابیت عەباسی، کۆبووەوە.

 

نووسینگەی سەرۆکوەزیرانی عێراق رایگەیاند لە کۆبوونەوەکەدا جگە لە دۆخی ناوچەکە، باسی گۆڕانکارییەکانی ئەمدواییەی سووریا و رۆڵی وڵاتانی ئەورووپا کراوە لە "ئاساییکردنەوەی بارودۆخی سووریا و پاراستنی یەکپارچەیی و سەروەریی خاکی سووریا."

 

هێزەکانی ئەڵمانیا لە ساڵی 2015ـەوە وەکو ئەندامی هاوپەیمانیی نێودەوڵەتی دژی داعش لە هەرێمی کوردستان و عێراقن. ئەڵمانیا رایگەیاندووە ئەوان لەسەر دوو بنەما لە هەولێر و بەغدان؛ هاوکاریی هێزە ئەمنییەکانی عێراق لەنێویشیان هێزی پێشمەرگە لە رووبەڕووبوونەوەی داعش، هەروەها پشتگیریی مەشق و را‌هێنان بە هێزی پێشمەرگە و سوپای عێراق.