چوونی خەڵک بۆ 14 ناوچەی شرنەخ قەدەخە کرا

 

بە گوێرەی راگەیێندراوێک کە رۆژی پێنجشەممە، 12ـی کانوونی یەکەم لەلایەن پارێزگای شرنەخ بڵاوکراوەتەوە، 14 ناوچەی سەربە ناوەندی شاری شرنەخ و شارۆچکەکانی جزیر، سلۆپی، باسا، قلەبان و ئەلکێ لە سنووری ئەو پارێزگایە وەک "ناوچەی ئەمنیی تایبەت" ناسێندراون و بۆ ماوەی 15 رۆژ چوون و هاتنی خەڵک بۆ ئەو ناوچانە قەدەخە کراوە.

 

بڕیاری قەدەخەکردنەکە رۆژی هەینی 13ـی کانوونی یەکەم دەستیپێدەکات و تاوەکو 27ـی مانگ بەردەوام دەبێت.

 

ئەو چیا و ناوچانەی قەدەخە کراون بریتین لە، "چیای جوودی، ناوچەی بەستا، چیای گورێ، کورەشین، دەریێ داوەتیا، کەلا مەمێ، فەڕاشین، زێرینە، چیای گابار، نەوالا سار، تەحتێ رەش، هۆزا مێری و ناوچەی تەنینێ". 

 

پارێزگەی شرنەخ رایگەیاندووە، "بە مەبەستی پاراستنی ئاسایشی نەتەوەیی، دەستەبەرکردنی سەلامەتی گشتی، رێگری لە تاوان و پاراستنی ماف و ئازادییەکانی دیکە، ئەو ناوچانە وەک ناوچەی ئەمنیی تایبەت راگەیێندراون" و داوای لە خەڵکی کردووە بۆ پاراستنی سەلامەتی خۆیان پابەندی بڕیارەکە بن و سەردانی ئەو ناوچانە نەکەن. 

 

سوپای تورکیا لەم دواییانەدا ئۆپەراسیۆنە سەربازییەکانی دژ بە گەریلاکانی پەکەکە لەسەر سنووری باکوور و باشووری کوردستان و چەند پارێزگایەکی دیکەی باکووری کوردستان زیادکردووە، بەو هۆیەوە قەدەخەی هاتووچۆ و ناوچەی ئەمنیی تایبەت لە ناوچەکەدا رادەگەیێنرێت.