رووداو - هەولێر
دادگای فیدراڵی ئەمڕۆ سێشەممە تانەی پەرلەمانی کوردستان و فراکسیۆنی پارتی لە پەرلەمانی عێراق لەسەر ماددەی 16ـی یاسای هەڵبژاردنی ئەنجوومەنی پارێزگاکانی عێراقی پەسەندکرد، بەوپێیەش ئاوارەکان دەتوانن لە ناوچەکانی خۆیان دەنگبدەن.
لە ماددەی 16ـی هەمواری یەکەمی یاسای هەڵبژاردنی ئەنجوومەنی پارێزگاکانی عێراق ژمارە 12ـی ساڵی 2018 دا هاتووە "ناوەندی هەڵبژاردن و دەنگدان بۆ ئاوارەکان لە بازنەی هەڵبژاردنی خۆیاندا لە شارە رزگارکراوەکان دەکرێنەوە بۆئەوەی بە کارتی درێژخایەنی دەنگدەر دەنگ بدەن". ئەمەش بەو واتایە ئاوارەکان ناتوانن لە کامپەکان و شوێنی ئاوارەبوونیان دەنگبدەن و ناچارن بگەڕێنەوە بۆ ناوچەکانی خۆیان بۆئەوەی بتوانن دەنگ بدەن.
ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عێراق ئەمڕۆ سێشەممە بە تۆڕی میدیایی رووداوی راگەیاند "دادگای فیدراڵی تانەی ئێمەی لەسەر ئەو ماددەیە قبووڵکرد و بەو پێیە ئەو ماددەیە هەڵوەشایەوە".
هاوکات خەسرەو گۆران، بەرپرسی دەزگای هەڵبژاردنی پارتیی دیموکراتی کوردستان ئەمڕۆ سێشەممە لە کۆنگرەیەکی رۆژامەوانیدا لە هەولێر رایگەیاند "سکاڵای ئێمە لەسەر دوو ماددە بوو، ماددەی 12 کە رێگە دەدات بە وردبوونەوە لە تۆماری دەنگدەران بەتایبەتی لە کەرکووک، بێگومان ئەمەش پێچەوانەی دەقی دەستوور بوو، چونکە نەدەکرا لە ناوچە کوردستانییەکانی دەرەوەی ئیدارەی هەرێمی کوردستان بەمشێوەیە پێداچوونەوە بە تۆماری دەنگدەران بکرێ".
خەسرەو گۆران گوتیشی "ماددەکەی دیکە کە تانەمان لێدا بریتییە لە مادەی 16 کە دەڵێ هەموو ئاوارەکان دەبێ بڕۆن لەو پارێزگایانەی کە لێیانەوە هاتوون دەنگبدەن، ئەمەش زۆر کەسی لە مافی دەنگدان بێبەش دەکرد، بۆیە دوای ئەم بڕیارە ئاوارەکان لە هەر شوێنێک نیشتەجێن دەتوانن دەنگبدەن".
سەردار سەباح هەرکی، پارێزەری پەرلەمانی کوردستان تایبەت بە تانەی پەرلەمانی کوردستان لە هەمواری یەکەمی یاسای هەڵبژاردنی ئەنجوومەنی پارێزگاکانی عێراق ئەمڕۆ بە تۆڕی میدیایی رووداوی راگەیاند "بڕیاری دادگای فیدراڵی عێراق ئەمڕۆ لەسەر سکاڵای ئێمە بوو، کە تانەمان لە ماددەکانی 3، 12، 16 و 17ـی هەمواری یەکەمی یاسای هەڵبژاردنی ئەنجوومەنی پارێزگاکانی عێراق ژمارە 12ـی ساڵی 2018 داوە و بە بڕیارەکەی دادگا ئەمڕۆ ئەو ماددانە هەڵوەشانەوە".
سەردار هەرکی گوتیشی "لە کۆی نۆ دادوەری ئەندامی دادگای فیدراڵ هەشتیان تانەکەی پەرلەمانی کوردستانیان قبووڵکرد، لەکاتێکدا فراکسیۆنی پارتی دیموکراتی کوردستان و فراکسیۆنی یەکێتی نیشتمانی کوردستان و وەزارەتی دادی هەرێمی کوردستان و چەند لایەنێکی سوننەش بەجیا تانەیان لە هەمان یاسا داوە و بڕیارە دادگای فیدراڵ 18ی ئەم مانگە بڕیار لەو تانانەش بدات".
بەپێی یاسای هەڵبژاردنی ئەنجوومەنی پارێزگاکانی عێراق بڕیارە لە مانگی نیسانی ساڵی 2020 هەڵبژاردنی ئەنجوومەنی پارێزگاکان بەڕێوەبچێ لەکاتێکدا پەرلەمانی عێراق لە مانگی رابردوو بڕیاری هەڵوەشاندنی ئەنجوومەنی پارێزگاکانی ئێستای دا و بەهۆی خۆپیشاندانەکان و ناڕەزایەتییەکان لە عێراق و هەوڵی هەموارکردنی دەستووری فیدراڵی هێشتا دیارنییە ئەنجوومەنی پارێزگاکانی عێراق دەهێڵدرێنەوە یاخود بەیەکجارەکی هەڵدەوەشێندرێنەوە.
ئەمە لەکاتێکدایە سەرۆکایەتی کۆماری عێراق دوێنێ دووشەممە پرۆژە یاسایەکی نوێ و یەکگرتووی بۆ هەڵبژاردنەکان رەوانەی ئەنجوومەنی وەزیرانی عێراق کرد و چاوەڕوان دەکرێ پرۆژە یاساکە دواتر رەوانەی پەرلەمان بکرێ بۆ پەسەندکردنی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ