بافڵ تاڵەبانی، سەرۆکی یەکێتیی نیشتمانیی کوردستان قسە بۆ ئەندام و لایەنگرانی حیزبەکەی دەکات لە دەڤەری راپەڕین
دێسکی هەڵبژاردن
بافڵ تاڵەبانی پەیامێکی ئاراستەی لایەنگرانی حیزبەکەی لە دەڤەری راپەڕین دەکات و دەڵێت: بەهۆی بوونی کێشەی تەکنیکی لە بڵندگۆکانی کەرنەڤاڵەکە و دروستبوونی پاڵەپەستۆ لەنێو ئامادەبوواندا نەمانتوانی بەردەوامیی بە کەرنەڤاڵەکە بدەین.
دوای ئەوەی ئەمڕۆ 12ـی تشرینی یەکەمی 2024، بە ئامادەبوونی بافڵ تاڵەبانی، سەرۆکی یەکێتیی نیشتمانیی کوردستان، کەرنەڤاڵی بانگەشەی حیزبەکەی لە دەڤەری پشدەر و بیتوێن بەڕێوەچوو، بەڵام وەک لە پەیامەکەیدا ئاماژەی پێکردووە، "بەهۆی بوونی کێشەی تەکنیکی لە بڵندگۆکانی کەرنەڤاڵەکە و دروستبوونی پاڵەپەستۆ لەنێو ئامادەبووان"، بافڵ تاڵەبانی گوتارێکی کورتی پێشکێش کرد و زوو کۆتایی بە کەرنەڤاڵەکە هێنا.
کەمێک لەمەوپێش، بافڵ جەلال تاڵەبانی، پەیامێکی بڵاوکردەوە کە ئاماژە بەوە دەدات، "دەمویست زیاتر لەگەڵتاندابم، بابەتی جیاوازتر باسبكەم و زۆرتر لەگەڵتاندا بمێنمەوە، بەڵام بەهۆی قەرەباڵخیی بێشومار و جۆشوخرۆشی ئێوەی خۆشەویستەوە، ژمارەیەك لە ئازیزانمان ئازاریان پێگەیشت و لەبەر سەلامەتیی هەموولایەك، وتارەكەمان كورتكردەوە تاوەكو هیچ ئازیزێكیترمان تووشی ناڕەحەتی نەبێت".
دەشڵێت، "سەلامەتی و تەندروستیی ئێوە بۆ ئێمە هەمووشتێكە، بۆیە دەستبەجێ تیمەكانی خۆم راسپارد تاوەكو لەنزیكەوە ئاگاداری دۆخی تەندروستیی ئەو ئازیزانە بن و لەگەڵیان بمێننەوە تاوەكو لە تەندروستییان دڵنیا دەبین".
بافڵ تاڵەبانی لە پەیامەکەیدا داوای لێبووردن لە ئامادەبووان دەکات و دەڵێت، بەهۆی گرفتی تەكنیكییەوە نەیانتوانوە گوێبیستی گوتەكانى بن.
لە دیمەنەکاندا دەردەکەوێ، کە بەهۆی گرفتی تەکنیکییەوە بافڵ تاڵەبانی مایکەکە فڕێدەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ