هاونیشتمانییەکی چۆمان: سوپای پاسداران 65 مانگای گوندەکەمانیان برد
رووداو دیجیتاڵ
بە گوتەی هاونیشتمانییەکی گوندی گوندەژۆر، سوپای پاسدارانی ئێران ئەمڕۆ 65 مانگای گوندەکەیانی بردووە، بەڕێوەبەری ناحیەی حاجی ئۆمەرانیش دەڵێ، لە هەوڵدان بۆ گەڕاندنەوەی مانگاکان.
گوندی گوندەژۆر سەر بە ناحیەی حاجی ئۆمەرانە لە قەزای چۆمان. سیامەند ئەحمەد خەڵکی گوندەکەیە و بە رووداوی گوت 17 مانگای لێ بردراوە.
هاونیشتمانییەکە دەڵێ "وەک هەمیشە، مانگاکان بۆ لەوەڕ لە قەڵا سەربازییەکانی سەر سنوور نزیک دەکەوتنەوە و کێشەیەکیان نەبوو، بەڵام ئەمڕۆ (شەممە، 12-10-2024) تەواوی مانگاکانی هەر 9 ماڵی گوندەکە کە ژمارەیان 65 مانگایە لە لایەن پاسدارانی قەڵاکەوە بردران."
هاوکات عەبدولوەهاب مەحموود، بەڕێوەبەری ناحیەی حاجی ئۆمەران بە تۆڕی میدیایی رووداوی راگەیاند "لە رێگەی پەیوەندییەکان و پاسەوانی سنووری عێراق بۆ گەڕاندنەوەی مانگان لە هەوڵداین".