رووداو دیجیتاڵ
لە رێکلامێکی یانەی تۆپی پێی ئارسیناڵی ئینگلیزی و ئەدیداسی سپۆنسەریدا، وەک هێمای رەسەنایەتیی باس لە نانی کوردی دەکرێت.
رێکلامەکە درێسی سێیەمی ئارسیناڵ پێشاندەدات کە نەخشەکەی تێکەڵەیەکی لە رەنگی شینی کاڵ و ئەرخەوانی؛ باس لەوە دەکات کە درێسەکە رەسەنایەتیی یاریزان، کولتوور و هاندەرانی یانەکە پێشاندەدات.
رێکلامەکە دەڵێت: "نەریتی پێش یاریکردنمان، بە تەواوی نەریتێکی بەریتانی نییە،" دوای ئەوە چەند خواردن و چالاکی رەسەنی کولتوور و وڵاتی جیا پێشاندەدات، یەکەمینیان نانی تەنووریی کوردییە.
رێکلامەکە دەڵێت: "ئێمە نانیشمان هەیە" و، وێنەی رێستۆرانتێکی کوردی لە باکووری لەندەن پێشاندەدات کە نانی تەنوور و خواردنی دیکەی کوردی دەفرۆشن.
رێستورانتەکە بە ناوی (بابان نان)ـەوەیە و کولێرەی ئاردی گەنم، جۆ و کولێرەی بە کونجی هەروەها کەبابی کوردی، فەلافل و کفتەش دەفرۆشێت.
خواردنگەکە بە رووداوی گوت، ئاگاداری رێکلامەکە نەبوون.
بەرهەمەکانی خواردنگەکە کە ژمارەیەک هاونیشتمانیی باشوور و رۆژهەڵاتی کوردستان بەڕێوەی دەبەن، لە تەواوی بەریتانیا بەنێوبانگن و بوونەتە مانشێتی زۆر لەو راپۆرتانەی لەسەر خواردن لە میدیا و چاپەمەنیی بەریتانیادا بڵاوکراونەتەوە.
لە باسی کولێرەکانی خواردنگە کوردییەکەدا، ئێد کەمینگ، نووسەری پێشووی پێگەی ئیندیپێندنتی بەریتانی لە راپۆرتێکی ساڵی 2020ـدا دەڵێت: "کە ئەم نانە گەرم، سووک، جیڕ و بەتامە لەسەر مێز بێت، کە هێشتا هەڵمی تەنوورەکەی بابانی لێ بەرزدەبێتەوە، کەس بەلایەوە گرنگ نییە چاوەڕێی خواردنێکی دیکە بکات. دەتوانی پاستەیەک لە دووکانێک بکڕی، گەرمیبکەیەوە و لەگەڵی بخۆی، هێشتاش سوپاسگوزار دەبیت."
هەروەها پێگەی تۆپ کووڤی کە تایبەتە بە ناساندنی خواردنگەکان دەڵێت، "بابان نان تەنوورێکە بە دیوارێکەوەیە، تامی راستەقینەی کوردانەی هێناوەتە باکووری لەندەن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ