دوا پەیامی شەهید نەریمان مەستی: من خۆم ئەم رێگەیەم هەڵبژارد
رووداو دیجیتاڵ
لە ساڵی 1974دا، پێنج گەنجی کورد، لەلایەن حکومەتی بەعسەوە لەسێدارە دران، ئەوان لەیلا قاسم، نەریمان فوئاد مەستی، جەواد ھەمەوەندی، حەسەن حەمەڕەشید و ئازاد سلێمان میران بوون.
،لەو ساڵەدا، لە سەرەتای تێکچوونی پەیوەندیی سەرکردایەتیی شۆڕش لەگەڵ حکومەتی عێراق، ئەو پێنج گەنجە کە خوێندکاربوون دەستگیرکران، راگەیاندنی بەعس ئەوانی وەکو "گێرەشێوێن و تیرۆریست" ناساند، بەبێ ئەوەی خۆیان دانی پێدابنێن.
شەهید نەریمان لە 01-01-1952 لە شاری سلێمانی لەدایکبووە، برازای تۆفیق وەهبییە، زۆر هاوڕێی شەهید حەسەن حەمەڕەشید بووە و پێکەوە چالاکییان کردووە و هەر پێکەوەش لەسێدارە دراون.
خەرامان فوئاد مەستی، خوشکی شەهید نەریمان فوئاد مەستی لەبارەی براکەیەوە قسەی بۆ رووداو کرد و گوتی:" بەرلەوەی شەهید نەریمان دەستگیر بکرێت، لە ماڵەوە نامەیەکی نووسی، ئێستاش نامەکەی لای من پارێزراوە و هەڵمگرتووە."
خەرامان فوئاد مەستی دەڵێت: "لە نامەکەیدا نەریمانی جوانەمەرگ نووسیویەتی: ئەمڕۆ ئێوارەی یەکەم رۆژی جەژنی قوربانە، دەکاتە 27-02-1969 کات چارەگی دەوێ بۆ شەشی ئێوارە، تەلەڤیزیۆنمان کردووەتەوە و گۆرانیی (ماذا أقول له) دەڵێت. من و چراخانیش لە هۆڵەکە دانیشتووین، لەم کاتەدا بیر لە 10 ساڵی داهاتوو دەکەمەوە کە ئایا مەکتەبمان تەواوکردووە یان نا؟ ئێستا دەڵێم: خۆزگەم بە 27-02-1979. یەکەم کاتیش ئەم سەعاتە، چارەکی بوێ بۆ شەشی ئێوارە."
خەرامان مەستی دەڵێ: "لە ساڵی 1973ـەوە وردە وردە دەرکەوت کە رێککەوتنی 11ی ئازار سەرناگرێت. هەستمکرد ئەوە شتی دیکەی لێدەکەوێتەوە و ئەوانیش (شەهید نەریمان و هاوڕێکانی) چالاکیی دیکەیان دەبێ، بەڵام نکۆڵی دەکرد و دەیشاردەوە."
پێش لەسێدارەدان، دایکی لەیلا قاسم سەردانیان دەکات. لەوێ شەهید نەریمان پێی دەڵێ: "من خۆم ئەم رێگەیەم هەڵبژاردووە."
ئازاد سلێمان میران، یەکێکە دیکەیە لەو پێنج گەنجە. سروود بایزی برازای لەبارەی ئەوەوە قسەی بۆ رووداو کرد و گوتی:" باوکی 14 کوڕی هەبووە و ئازاد کوڕی نۆیەم بووە، بەڵام لە هەمووان زیاتر سەرقاڵی کوردایەتی و خوێندن بووە."
دڵشاد میران، رێکخستنی نهێنی لە سەردەمی شۆڕش دەڵێت: "لە ساڵی 1974 کە دۆخەکە تێکچوو و زانرا رێککەوتنی 11ی ئازار سەرناگرێ و شەڕ دەستپێدەکات. من و شەهید ئازاد ویستمان پەیوەندی بە شۆڕشەوە بکەین و چووینە ناوپردان، بەڵام برادەران پێیان خۆش نەبوو و گوتیان: بگەڕێنەوە بەغدا و دۆخی ئەوێ باش نییە، لەوێ لەناو زانکۆ دەست بە چالاکیی نهێنی بکەنەوە، هەر ئەو شەوە ئێمەیان ناردەوە بۆ ئەوەی نەزانن ئێمە رۆشتووین."
دڵشاد میران دەڵێ: "ئەگەر شەهید نەریمان و شەهید حەسەن، دانیپێدانانیان لەسەر هاوڕێکانیان کردبا، لانیکەم 50 کەسی دیکە لەسێدارە دەدران."
لە کاژێر 07:00ی بەرەبەیانی 12ی ئایاری 1974، ئەو پێنج گەنجە لەلایەن رژێمی بەعسەوە لەسێدارەدران. ھەواڵی لەسێدارەدانی لەیلا قاسم، لە میدیا جیهانییەکانی ئەوکات بڵاوکرایەوە و لەسێدارەدانی وەکو لەسێدارەدانی یەکەم ژن لە مێژووی سیاسیی عێراق باسکرا.
دوای شەهیدکردنیان، کەسوکاریان تەرمەکان وەردەگرنەوە و دەبینین، چاوەکانی شەهید ئازاد دەرهێنرابوون، لەکاتی هەڵواسیندا هەردوو قۆڵەکانی لای شانی شکابوون، بە حەربە (چەقۆی سەربازی) جەستەی بریندار کرابوو.