لە رووداوێکی هاتووچۆدا لە ئامەد سێ کرێکاری رێگەوبان گیانیان لەدەستدا

 

رووداوەکە بەیانیی ئەمڕۆ چوارشەممە 12ـی نیسانی 2023 لە رێگەی ئامەد-ئەرگانی لە ناوچەی دەڤەگەچیدی روویدا.

 

تیمێکی سەر بە بەڕێوەبەرایەتیی رێگەوبانی ئامەد لە رێگەی سەرەکی ئامەد-ئەرگانی کاری پاککردنەوەی رێگەکەیان دەکرد و ئۆتۆمبێلێک خۆی کێشا بەو کرێکارانەدا و بەو هۆیەوە سێ کرێکار گیانیان لەدەستدا و یەکێكی دیکەش بەقورسی بریندار بوو. 

 

دوای ئەوەی هاونیشتمانییان لایەنە پەیوەندیدارەکانیان ئاگادارکردەوە، تیمەکانی فریاکەوتنی 112 و پۆلیس و جەندرمە رەوانەی شوێنی رووداوەکە کران. 

 

کرێکارە بریندارەکە بە ئامبولانس گوێزرایەوە بۆ نەخۆشخانە و تیمەکانی جەندرمە رێوشوێنی ئەمنی بەرفراوانیان لە ناوچەکەدا گرتەبەر.

 

بەهۆی رووداوەکەوە رێگەی سەرەکی ئامەد-ئەرگانی بۆ ماوەیەک بە رووی هاتووچۆدا داخرا و لەلایەن فەرماندەیی جەندرمە لێکۆڵینەوە لە رووداوەکە دەستیپێکردووە.