لە دێگەڵە قەرەباڵخیی زۆر دروستبووە؛ سەدان بارهەڵگر و ئۆتۆمبێل گیریان خواردووە

ئەمشەو یەکشەممە، هیدایەت هەمزە، شۆفێری بارهەڵگر بە رووداوی گوت، زیاتر لە دوو کاژێرە سەدان بارهەڵگر لە بازگەی دێگەڵە گیریان خواردووە و هیچ جووڵەیەک نییە، رێگەکە بەتەواوی داخراوە.

 

قەرەباڵخیی ئەو رێگەیە دوای ئەوە هات، دانیشتووانی سنووری خەلەکان رێگەی نێوان هەولێر-سلێمانییان داخست. هاتووچۆی بارهەڵگر و ئۆتۆمبێلی تایبەت لەنێوان ئەو دوو شارە کەوتە رێگەی دێگەڵە.

 

 

سەرچاوەیەکی باڵا لە پارێزگای هەولێر بە رووداوی گوت، "رێگەی هیزۆپ لەلایەن خەڵکەوە داخراوە، بۆیە قەرەباڵخی کەوتووەتە سەر رێگەی دێگەڵە و لە هەوڵداین کێشەکە چارەسەر بکەین".

 

لە ماوەی کەمتر لە ساڵێکدا، چوارەم جارە شاڕێگەی سلێمانی و هەولێر و ئیدارەی راپەڕین لەلایەن دانیشتووانی دۆڵی خەلەکانەوە بەڕووی ئۆتۆمبێلی بارهەڵگردا دادەخرێت.

 

داواکاریی گوندنشینانی خەلەکان تەواوکردنی قۆناخی دووەمی رێگەکەیە، کە 25 کیلۆمەترە و بۆ تەواوبوونی نزیکەی 30 ملیار دینار پێویستە.