هەڵەیەک روویدا! دووبارە هەوڵبدە
رووداو دیجیتاڵ
لە هەڵمەتەکەی شەوی رابردووی هەولێر 102 پیاو و 77 ژن لە شوێنێکی گەشتیاریی دەستگیرکراون و بەگوتەی پارێزگاری هەولێر، لە هەر شوێنێکی پایتەخت کاری لەشفرۆشی و قومار بکرێت، دادەخرێت.
شەوی سێشەممە پۆلیسی هەولێر چووەسەر شوێنێکی گەشتیاریی، لەبارەی رووداوەکەوە ئومێد خۆشناو، پارێزگاری هەولێر بە تۆڕی میدیایی رووداوی راگەیاند: "لە چوارچێوەی ئەو بڕیارانەی کە بۆ چاودێریی و رێکخستنەوەی یانە شەوانەکان رامانگەیاندبوو شەوی سێشەممە کاژێر 23:00 بە هەماهەنگیی لەگەڵ پۆلیسی هەولێر و هێزێکی ئەمنیی تایبەت، شوێنێکی بەناو گەشتیاریی کە تێیدا قومار و لەشفرۆشی دەکرا، داخرا و 179 کەس لەگەڵ خاوەن شوێنەکە دەستگیرکراون".
لەو 179 کەسەی دەستگیرکراون 102 کەسیان پیاون و 77 کەسیشیان ژنن. ئومێد خۆشناو ئاماژەی بەوە کرد، ئەو کەسانە هەموو لە گرتووخانەی هەولێرن و دەدرێنە دادگە و بەپێی یاسا مامەڵەیان لەگەڵ دەکرێت.
بەگوتەی پارێزگاری هەولێر "ئەم هەڵماتانەشمان بەردەوام دەبێت و هەر جێگایەک کە تێیدا کاری لەشفرۆشی و قومار بکرێت، دادەخرێت".
هەروەها پۆلیسی هەولێر راگەیێندراوێکی بڵاوکردەوە و تێیدا هاتووە کە هەڵمەتەکە بە هەماهەنگیی لەگەڵ ئەنجوومەنی ئاسایشی هەرێمی کوردستان کراوە و دەست بەسەر بڕێکی زۆر کەلوپەلی بەکارهێنانی ماددەی هۆشبەر و کەرستەی قەدەخەکراو و جۆرەها حەبدا گیرا.
هەر ئەمڕۆ چەند کارمەندێکی ئەو شوێنە گەشتیارییە کە نەیانویست ناویان بڵاوبکرێتەوە بە رووداویان راگەیاند : کاژێر 23:00 ـی شەوی رابردوو هێزە ئەمنییەکان هاتن و ئەوانەی لەوێ بوون دەستگیرکراون.
لەبارەی ناسنامەی ئەو کەسانەی دەستگیرکراون، سەرچاوەکانی رووداو ئاماژەیان بەوەکرد: ئەو گەشتیارانەی سەردانی ئەو شوێنە دەکەن 95% یان عەرەبن . لەو شوێنە گەشتیارییە 50 جێگای پشوودان و دوو یانەی شەوانە هەن، ئەو کەسانەی کە دەڕۆنە ئەو شوێنە لەگەڵ خۆیان کچ دەبەن کە زۆربەیان عەرەب ، سووری و فارسن.
بەگوتەی کارمەندانی شوێنە گەشتیارییەکە "هەر شەو مانەوە لە ژوورەکان لە 100 دۆلار تاوەکو 1000 دۆلارە. هەندێک کەس ئەوەندە هاتوون بۆ ئێرە وەکو برادەرمان وان".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ