لە کەرکووک مامۆستایانی وانەبێژ خۆپێشاندانیان دەستپێکرد و داوای دامەزراندن دەکەن

 

 

رۆژی یەکشەممە 11-12-2022 یەکێک لە مامۆستایانی گرێبەست لەناو خۆپێشاندانەکەدا بە هەردی محەممەد، پەیامنێری رووداوی راگەیاند، "لە بودجەی 2023ی عێراق چەسپێندراوە کارمەندانی گرێبەستی وەزارەتی داد و کارەبا بە هەمیشەیی بکرێن و ئێمەش بە مافی خۆمانی دەزانین هاوشێوەی ئەوان گرێبەستەکانمان بکرێتە هەمیشەیی."

 

بە گوتەی ئەو مامۆستایەی کەرکووک، ئەوان بۆ ماوەی سێ رۆژ لە خۆپێشاندانەکانیان بەردەوام دەبن و دەڵێت، "داوا لە سەرۆکوەزیران دەکەین بڕیار لە بەهەمیشەییکردنی گرێبەستەکانمان بدات، تاوەکو ئەوکاتەی ئەو بڕیارەش دەرنەچێت ناگەڕێینەوە هۆڵەکانی خوێندن."

 

لە کاژێر 09:00ی بەیانییەوە مامۆستایانی گرێبەست لە کەرکووک خۆپێشاندانیان دەستپێکردووە و مامۆستایەکی دیکە بە پەیامنێری رووداوی گوت، "تائێستا هیچ بەرپرسێک لە پەروەردەی کەرکووکەوە بەدەم داواکارییەکانمانەوە نەهاتووە."

 

لە سنووری پەروەردەی کەرکووک نزیکەی 17 هەزار مامۆستای گرێبەست هەن و بەشێک لەو مامۆستایانە دەڵێن، هێشتا لە زۆربەی قوتابخانەکان پێویستیان بە مامۆستای دیکەیە.