هەڵەیەک روویدا! دووبارە هەوڵبدە
ئەلێکساندەر ستێفانوتۆ لە چێشتخانەیەکی سنووری قەزای شێخان.
رووداو دیجیتاڵ
گەشتیارێکی ئەڵمانی بە ناوی ئەلێکساندەر ستێفانوتۆ هەفتەیەکە بە بایسکل بە تورکیا دا هاتووەتە هەرێمی کوردستان. چوار رۆژە لە یەکێک لە خواردنگەکانی سنووری قەزای شێخان دەمێنێتەوە. خواردن و خواردنەوەی بێبەرامبەر پێشکێشی دەکرێت.
ماوەی دوو ساڵ و دوو مانگە گەشتەکەی بەردەوامە و 11یەمین وڵاتە سەردانی دەکات. میواندۆستیی خەڵکی هەرێمی کوردستان سەرنجی راکێشاوە. خواردنی بەچێژ و گەرموگوڕیی خەڵک بەرز دەنرخێنێت.
ئەلێکساندەر ستێفانوتۆ دەڵێت: "خۆشەویستییان پێبەخشیم. خۆشەیستی و رێزیان بەرامبەرم نواند. ژینگەیەکی ئاشنایان پیشنمدا. وەکو برا مامەڵەم لەگەڵ دەکەن و بەبەشێک لە خێزانەکەی خۆیانم دادەنێن. برنج، مریشک و زەڵاتەی ئێرە زۆر بەتامە."
خاوەنی چێشتخانەکە گەرماو، شوێنی مانەوە و خواردنی بێبەرامبەری بۆ دابینکردووە.
خەلیل گەودانی، خاوەنی چێشتخانەکەیە و دەڵێت: "گوتی دەمەوێت سەرم بشۆم، زۆر ماندووم. منیش گوتم بەسەر چاو و گەرماوم پێشاندا. سەری خۆی شۆرد و شوێنی نووستنم پێشاندا. کاتێک ئەو شتانەم بۆ کردن زۆر دڵی پێخۆش بوو."
هەموو شتەکانی بەسەر بایسکلەکەیەوەن. کێشی کەلوپەل و بایسکلەکەی پێکەوە 80 کیلۆگرامە. بەدوای نێوبانگی کوردستانەوە هاتووە و بەنیازە مانگێک بمێنێتەوە.
ستێفانوتۆ دەڵێت: "کاتێک لە تورکیا بووم خەڵکێکی زۆر باسی کوردستانیان بۆ کردم. باسیان دەکرد کە چەند جوانە و دڵی خەڵکەکەی چەند گەورەیە. منیش گوتم باشە من دەڕۆمە ئەوێ."
ستێفانوتۆ دەیەوێت سەردانی لالش، ئامێدی، بارزان، سۆران و هەولێریش بکات. دواتر سەردانی ئێران، ئەفغانستان و چەند وڵاتێکی دیکەش دەڕوات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ