رووداو دیجیتاڵ
هەپەگە کوشتنی پێنج سەرباز و سوپای تورکیاش گیانلەدەستدانی دوو گەریلای لە خاکی هەرێمی کوردستان بڵاوکردەوە.
رۆژی پێنجشەممە، 10ـی تشرینی یەکەمی 2024، ناوەندی چاپەمەنی و راگەیاندنی هەپەگە لە راگەیێندراوێکدا بڵاویکردەوە، لە رۆژانی نێوان 8-9ـی مانگدا، نۆ جار لە ناوچەکانی زاپ، خواکوڕک، مەتین و گارە هێرشیان کردووەتە سەر هێزەکانی تورکیا.
ناوەندی چاپەمەنی و راگەیاندنی هەپەگە دەڵێت، لە ئەنجامی هێرشەکاندا پێنج سەرباز کوژران، سێ سەرباز بریندار بوون، شۆڤڵێکیان تەقاندووەتەوە.
رۆژی 8ـی تشرینی یەکەمی 2024، وەزارەتی بەرگریی تورکیا، لە هەژماری تایبەتی لە تۆڕی ئێکس، گیانلەدەستدانی دوو گەریلای پەکەکە بڵاوکردەوە و رایگەیاند: "سوپای تورکیا لە پێناو ئاسایشی سنوورەکان و دەستەبەرکردنی ئارامی و ئاسایشی ناوچەکە، لە ئۆپەراسیۆنەکانی ریشەکێشکردنی تیرۆریستان بەردەوامە."
وەزارەتی بەرگریی تورکیا لە راگەیێندراوەکەدا باس لەوە دەکات، لە ئۆپەراسیۆنەکەدا دوو گەریلا لە گارە و خواکورک کرانە ئامانج.
ئەم شەڕ و پێکدادانە لە چوارچێوەی ئۆپەراسیۆنێکدایە، کە تورکیا ناوی ناوە چنگ- قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکردووە و تائێستاش بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ