بافڵ تاڵەبانی: بەمنزیکانە شاندێکی یەکێتی سەردانی هەموو لایەنەکان دەکات

 

بافڵ تاڵەبانی: دەمەوێ یەکێتیی نیشتمانیی کوردستان ببێت بە حیزبێکی مۆدێرن، لەگەڵ هاوڕێیەکم قسەم دەکرد، گوتم: دەبێ یەکێتی مێریتۆکراسی Meritocracy بێت.

 

 

بافڵ تاڵەبانی: ئەوە جەنابت بە کوردی زانیت، چونکە سێ چوار کەس لە ژوورەکەم بوون و پرسیم ئەمە بە کوردی چییە، گوتیان بە کوردی هەر نییە. دەی نەگبەتییەکەی ئێمە ئەوەیە کە کەس نەیدەزانی وشەکە چییە؟ ئەگەر ئێمە کەشێکی وا دروست بکەین کە خەڵکی باش بۆ شوێنی خۆی، هەروەها گۆڕانکاریی لە حیزبدا ئاسایی بێت و نەبێ بە بڤە. دەبێ کۆنگرە لە کاتی خۆیدا بکرێت، لەنێوان کۆنگرەکان دەبێ پلنیۆم بکەین، دەبێ ئەو دیدارەی کە کردمان (سوپاسی کاک قوباد و تیمەکەی دەکەم بەڕاستی شتێکی سەرکەوتووبوو) یەکێک لە هۆکارەکانی سەرکەوتنی کۆنگرە، وابزانم 16هەزار کادیر گفتوگۆیان لەسەر هەموو خاڵەکان کردبوو، دەمەوێ بیروبۆچوون و خوێنی تازە بێنینە ناو حیزبەکە. بۆ ژنان نایەنە ناو سیاسەت؟ بۆ گەنجان نایەنە ناو سیاسەت؟ کاک دکتۆر! دەنگمان پێنادەن. نەک تەنیا بە یەکێتی، بە هەموو حیزبەکان. بابە بێزارن لێمان، بێزارن لەو سیاسەتە کۆنە، دەبێ ئێمەش خۆمان بگۆڕین، دەبێ پیشانیان بدەین کە جیاوازین و رای جیاوازمان هەیە، سیاسەتی جیاوازمان هەیە، ئەمەش دەسەلمێنین. ئەوە پێمان دەکرێت دەبێ، یاسا یاسا بێت، دامەزراوە دامەزراوە بێت، دەبێ رێزی هەموو کەسێک بگیرێت و ئازاد بێت و رای هەبێت، دەبێ چی دەکەن بیکەن. من بیرمە چەند ساڵ لەمەوبەر یەکێک کاریکاتێرێکی زۆر ناشرینی مام جەلالی دروستکردبوو، زۆر ناشرین بوو.. من لای دکتۆر خەسرەو بووم، بە رێککەوت مام تەلەفۆنی بۆ کرد و وتی: دکتۆر تۆ بیستووتە ئەو پیاوە ئەم کاریکاتێرانە لەسەر من دروست دەکات؟ دکتۆر گوتی: بەڵێ. مام گوتی: ئیشی تۆ ئەوەیە بیپارێزی. دەبێ ئێمە ئەو کەشە دروست بکەین، بێگومان من لەوە تێگەیشتم و زۆر جوان بوو.

 

 

بافڵ تاڵەبانی: کە من باسی ئەوەم دەکرد کە دامەزراوە بەهێزبێت، رێک مەبەستم ئەمە بوو، ئێستا ئێمە شتێکمان لەناو یەکێتی کردووە، ئێمە ئەنجوومەنی پشتیوانیمان هەیە، خەڵک زۆر دەپرسن ئەم ئەنجوومەنە چ کارەیە؟ ئیشی ئەم ئەنجوومەنە زۆر زۆر گرنگە.. لە روویەکەوە هێندەی سەرکردایەتی گرنگە، ئەمان چاودێر دەبن، چەندین کۆمیسیۆن دروست دەکەین و بەدواداچوون بۆ ئیشەکانمان دەکەین، دەتوانم بڵێم ئەمە پەرلەمانێکی بچووکە. بۆ بچووکترین خزمەت بە میلـلەتەکەمان، پێویستە بە زووترین کات هەڵبژاردن بکەین، پەرلەمان پەرلەمان بێت و حکومەت حکومەت بێت، حیزبەکان ناتوانن ببن بە جێگرەوەی حکومەت، یەکێتی بەنیاز نییە وابکات، ئێمە شەریکێکی زۆر زۆر بەوەفاین، هیچ ئەملاولامان نییە، ئێستاش لەناو حیزبەکەمان راکان زۆربەیان وەکو یەکن، لەسەر شتی بچووک زۆر زۆر گفتوگۆ دەکەین، زۆر حەزیشم لەو موناقەشانەیە. 

 

دەبێ کارێک بکەین کە ئەمجارە حکومەتەکەمان جیاوازتربێت لە هەموو حکومەتەکانی تر. ئەوە چۆن دەکرێت؟ دەبێ سەرنجمان لەسەر ئەوە بێت کە حکومەتەکەمان ببێت بە حکومەت، من بەکاری نەهێنم بۆ ئەوەی یەکێتی بەهێز بکەم، فڵان کەس بەکاری نەهێنێ بۆ ئەوەی حیزبەکەی بەهێز بکات، دەبێ ئامانجەکەی ئێمە خزمەتکردنی ئەم میلـلەتە بێت، چونکە لێمان قبووڵ ناکەن.ئەمڕۆ گەنجێکی کوردستان ئەوەی دەوێ کە لە بەریتانیا دەیانەوێت، ئەوەی دەوێت کە لە ئیتاڵیا هەیە.

 

 

بافڵ تاڵەبانی: با نهێنییەکی ناو حیزب ئاشکرا بکەم، ئێمە بەنیازین وەفدێک بنێرین بۆ لای هەموو حیزبەکان، هەوڵێک بدەین کە بە بیر و بۆچوونێکی تازە، بەرنامەی خۆمانیان بۆ شەرح بکەین، ئەوەی کە پێشتر روویانداوە هیچ حسابیان بۆ ناکەین، دەمانەوێ جارێکی دیکە دەستپێبکەین، هەوڵێکی جیدی لەگەڵ هەموو لایەنەکان دەدەین، ئیشەڵلا ئەوەش بەو نیەتە وەردەگیرێت کە ئێمە مەبەستمانە. تۆش دەتوانیت قسەیەکی خێری تێدا بکەی.

 

 

بافڵ تاڵەبانی: ئێمە دەتوانین لە بەغداوە خزمەتی کوردستان بکەین، بەڵام زۆر باشتر دەبێت ئێمە بەیەکەوە کار بکەین، حەقوایە هەموو حیزبە کوردستانییەکان بەیەکەوە بچین بۆ بەغدا بۆ پشتیوانیی حکومەت. وەفدی حکومەت با بڕوا، بەڵام من پێموایە ئەگەر حیزبەکان یەک بن، هەم وەفدی حکومەت بەهێزتر دەبێت، هەم قسەی دیکە هەیە لە شوێنی دیکە کە خەڵک دەتوانێ بیکات بۆ هەمان ئامانج، نموونەشمان هەیە کە توانیومانە لە چەند بابەتێک بەیەکەوە کار بکەین و رامان نەگەیاندووە. نزیکترین نموونە ئەوەیە کە وەفدی حکومەت بە سەرۆکایەتیی جەنابی کاک مەسرور، کە زۆرم بەدڵ بوو و شتێکی زۆر ئازایانە بوو، کە چوو بۆ بەغدا، ئێمە ئێوارەکەی هەستمان کرد رەنگە چەند لایەنێک ناڕەحەت بن، من و کاک قوباد بەیەکەوە دەستمان کرد بە تەلەفۆنکردن بۆ پشتیوانیی حکومەت و تێمان گەیاندن کە ئەمە پرسی میلـلەت و خەڵکە و خەڵک دۆخیان خراپە. واتا دەتوانین بەیەکەوە کار بکەین، بەڵام پێویستی بە ئاپدەیتێکی نوێیە. خۆشبەختانە دەتوانین ئەم کۆنگرەیە و ئەم سەرکردایەتییە تازەیە بکەین بە بیانووەکە، ئێستا ئێمە بە نیازین ئەمە بکەین، بۆیە دەمانەوێ بە زووترین کات سەردانی هەموو لایەنەکان بکەین، دانیشین بزانین لەکوێ دەتوانین رێکبکەوین و لەکوێ دەتوانین بەیەکەوە کار بکەین؟.

 

 

بافڵ تاڵەبانی: لایەنەکانی کوردستان لەپێشدا، بەڵام بۆ بەغدا ئێمە سەردانەکانمان بەردەوامە، بۆ پرسی هاوپەیمانیش ئێمە لەگەڵ هەموو لایەنێک لە بەغدا هەوڵ دەدەین، ئێمە گرووپێک هەڵبژێرین، بەڵکو دەمانەوێ لەگەڵ هەموو لایەنێک پەیوەندییەکی باشمان هەبێت، چونکە پێمان وایە بەمشێوەیە دەتوانین باشتر خزمەت بکەین. راستە یەکێتی توانیویەتی لەم دوو ساڵە خۆی زیندوو بکاتەوە لە بەغدا، دەزانن دوو ساڵ پێش ئێستا یەکێتی ئەو قورسییەی وەکو پێویست نەبوو لە بەغدا؟ بەڵام ئێستا بە هاتووچۆکانمان، بە گفتوگۆکانمان و بە راستگۆییەکەمان، کە ئێمە دەڕۆین و ئەوەی دەیڵێین، مەبەستمان هەمان شتە، کە دەڵێین شتێک دەکەین، دەیکەین. ئەمە بەشێکی سەرەکی بووە لە دروستکردنی ئەم پەیوەندییانە. من پێموایە حیزبە کوردییەکان بەیەکەوەبین، تەواوکەری یەک دەبین، رەنگە من پێوەندیم لەگەڵ لایەنێک باش نەبێت، یەکی دیکە دەتوانێت چاکی بکاتەوە و بەپێجەوانەشەوە، بەڵام ئەوە پێویستی بە پێداچوونەوەیەکە بە پەیوەندییەکان و پشت بەخوا بە زووترین کات ئێمە دەست دەکەین بە هەوڵدان بۆ ئەو پێداچوونەوەیە.

 

 

بافڵ تاڵەبانی: بەڵێ، ئێمە پەیوەندیمان لەگەڵ زۆر لایەن هەیە کە رەنگە لە تەلەڤیزیۆن نەیبینن.

 

 

بافڵ تاڵەبانی: ئێمە دەتوانین ئێستا ئەمە بکەین. بڕگەیەکمان خستە نێو قانوونی بودجە کە دەتوانێت سلێمانی بەرپرسیارێتییەکانی خۆی جێبەجێ بکات و راستەوخۆ مووچە لە بەغدا وەربگرێت، ئەگەر هەر لایەنێک بەرپرسیارێتیی خۆی جێبەجێ نەکرد، بەڵام ئەوە ئامانجی ئێمە نییە، ئەوە گەرەنتییەک بوو بۆ خەڵکی سلێمانی ئەگەر خوای نەکردە تووشی کێشەیەک بین و ستەمێک لە سلێمانی بکرێت. ئامانجی ئێمە پاراستنی هەرێمە. ئەم هەرێمە بە خوێنی شەهیدەکانی یەکێتی و لایەنەکانی دیکە دروستبووە، ئێمە نابێت کورتبینانە بیر بکەینەوە، ئەگەر ئێستا بچین سلێمانی جیا بکەینەوە بۆ چەند مانگێک تاوەکو مووچە وەربگرین و خوای نەکردە لایەنێکی دیکە مووچە وەرنەگرێت، ئەی دوای ئەمە چی روودەدات؟ دەتوانی بەیەکەوەی بلکێنیتەوە؟ نا. ئێمە دەبێ بەیەکەوە کار بکەین. 

 

من چەند خەم دەخۆم بۆ سلێمانی، ئەوەندە خەم بۆ زاخۆ و دهۆک دەخۆم. ئێستا یەکێک لەو شتانەی کە من دەمەوێ بیکەم، دەمەوێ بە جۆرێک بتوانین بەرنامەیەک دابنێین لەگەڵ دانە گاز، بەشکم گازەکەی زیاد بکات بتوانین شتێک بکەین و بتوانین کارەبای دهۆک و سلێمانی بکەین بە 24 سەعات. ئێمە وەکو پێویست کارمان نەکردووە، ئاساییترین شت کارەبایە، لە ماقادیشو (پایتەختی سۆماڵ) کە محەممەد فەراح-یان لابرد، دوای 9 مانگ کارەبای 24 سەعاتیان هەبوو. ئێمە سەدام لە 1991ـەوە نەماوە، ئێستاش کارەبامان نییە و دەشمانەوێ خەڵک دەنگمان پێبدات.

 

 

بافڵ تاڵەبانی: ئێمەش ئەوەمان ناوێت.

 

 

بافڵ تاڵەبانی: ئەو بڕگەیەی خرایە نێو یاسای بودجە، ئەمە بۆ ئەگەرەکانە، دەبێ بیر لە هەموو شتێک بکەیتەوە، دەبێ حیسابی هەموو شتێک بکەیت، باشترین دۆخ و خراپترین دۆخ. نابێ ئێمە هەر وا بڕۆین و بیر لە سبەی بکەینەوە، دەبێ بیر لە پێنج بۆ دەساڵی دیکە بکەینەوە، هەڵبژاردە گرنگە، خەڵک دەبێ هەڵبژاردەی هەبێت و خۆی نەبەستێتەوە، بەڵام دووبارەی دەکەمەوە؛ ئاخر شت کە یەکێتیی نیشتمانیی کوردستان ئەیەوێ بیبینێت، دوو ئیدارەییە. بەڵام ئێمە ئیدارەیەکمان دەوێ کە ئیدارەی هەموو لایەک بکات و هەموو کوردستان بە یەک چاو سەیر بکەین. چەندە حیزبایەتی لە حکومەت دوور بکەوێتەوە، من پێموایە حکومەتەکەمان باشتر دەبێت.

 

 

بافڵ تاڵەبانی: ئێمە سنوورێکمان هەیە لەگەڵ ئێران، چەند سەت کیلۆمەترێکە، چەندینجار کە کورد لێی قەوماوە، رایان کردووە بۆ ئێران. پەیوەندییەکی دوورودرێژمان هەیە لەگەڵ ئێران و پێشمان خۆشە و پەیوەندییەکی زۆر زۆر گرنگە، بەڵام یەکێتی هەموو جارێک وابووە، یەکێتی پەیوەندی لەگەڵ هەموو لایەک هەیە، من دڵنیاتان دەکەمەوە، تەسەور ناکەم حیزبێکی دیکە هەبێت لە کوردستان پەیوەندی لەگەڵ ئەمریکییەکان ئەوەندە باش بێت. بەینمان زۆر خۆشە لەگەڵ براکانمان لەگەڵ هەموو وڵاتە ئەوروپییەکان. ئەمە سیاسەتی مام جەلالە. مام جەلال دەچوو بۆ تاران و لەوێوە دەچوو بۆ واشنتن. چەند مانگێک پێش ئێستا ئێمە لە بەریتانیا بووین، دوای ئەوە چووین بۆ تاران، چەند رۆژێکی دیکە دەچین بۆ ئەمریکا. ئەمە سیاسەتی حیزبە، دەبێ پەیوەندیمان لەگەڵ هەموو لایەک هەبێت، بە باش و بە خراپ.  

 

بافڵ تاڵەبانی: زۆر باشە.

 

 

بافڵ تاڵەبانی: بەڵێ وەکو یەکێتی باشە، پشت بە خودا باشتریش دەبێت. یەکێک لە ئامانجەکانمان ئەوەیە مەکتەبی پەیوەندییەکان زۆر بەهێز بکەین. وای لێهاتبوو پەیوەندییەکە تەقریبەن من و کاک قوباد بەشێوەیەکی ناڕەسمی بەڕێوەمان دەبرد، بەڵام ئەمجارە خەڵکی باشمان دۆزیوەتەوە لە گەنجان بۆ ئەوەی یارمەتی کەسی ژمارە یەکی پەیوەندییەکان بدەن، کەسی ژمارە یەکی پەیوەندییەکان بەتەنیا ئەمەی پێ ناکرێت، یەکەمجار پێویستە تیمێکی بەهێزی بۆ دروستبکەین، ئینجا تیمەکەی رادەست بکەین. سیاسەتی ئێمە ئەوەیە پەیوەندییەکانمان لەگەڵ هەموو لایەک بەهێز بکەین.

 

 

بافڵ تاڵەبانی: ئێستاش ئامۆژگاریمان دەکەن لەسەر یەکڕیزی و یەکێتی، سوپاسی هەر هەموویان دەکەم. هەندێکیان لێرە دانیشتوون و حەزدەکەم یەک بە یەک سوپاسی هەموویان بکەم، زۆر هاوکارمان بوون. کێشەکە ئەوەیە هەندێجار ئێمە گوێیان لێ ناگرین.

 

 

بافڵ تاڵەبانی: با یەکەمجار لە هێزی 70ـوە دەستپێبکەم، ئێمە چاوەڕێی خوشک و برا بیانییەکانمان نەکردووە و ریفۆرمی خۆمان لەنێو هێزی 70ـدا کردووە. لیواکانمان رێکخستووەتەوە، گەنجەکانمان خستووەتە چەند لیوای تایبەت و بە ئەزموونەکان لە چەند لیوایەکی دیکەن، هێزەکانی یەکێتی هەمووی کۆکراوەتەوە، سەردەمێک بوو فڵانە کەس هێزی هەبوو و فڵانە هێزی هەبوو. ئێستا هێزی یەکێتی هەیە، هێزە تایبەتەکانمان، دژە تیرۆر و کۆماندۆ چوونەتە ئاستێک کە هەموو لایەنێک دڵی پێی خۆشە، بەڵام ئامانجی ئێمە ئەوەیە هێزەکانی 70 و 80 یەکبگرنەوە و بۆ ئەمەش کاری زۆرمان کردووە و قەلەقیشم لەوەی پرۆسەکە چەقیوە. لەسەر شتێکی زۆر سادە چەقیوە و تاوەکو ئێستا نەمانتوانیوە وەزیرێک بە وەکالەت بێت یان هەر شێوەیەک دابنێین، تێناگەم بۆچی ئەگەر راستیت دەوێت. ئەمە بۆ پێشەوە دەڕوات و هێشتا پەیوەندیمان لەگەڵیان هەیە، بەڵام بەداخەوە ئەمەش شتێکە کە بووەتە کێشەیەکی سیاسی، کە ئامانجەکە ئەوە بوو دوور بکەوێتەوە لە سیاسەت.

 

 

بافڵ تاڵەبانی: ئەی ئێستا بەم شێوەیەن، ئێمە دەبێ راشکاو بین لەگەڵ یەکدی، ئێستا هێزی یەکێتی، هێزی یەکێتییە.

 

 

بافڵ تاڵەبانی: نا بیانووە.

 

 

بافڵ تاڵەبانی: کێشەی ئێمە لەگەڵ تورکیا قورسە چارەسەر بکرێت، بە گاڵتەوە گوتم ناچم بۆ تورکیا، بەڵام من بە جدی ناچم بۆ تورکیا، ئێستا ناتوانم بچم بۆ تورکیا، تورکیا سێ پاڵەوانی شەڕی داعش، سێ هاوڕێی خۆمی لە عەربەت شەهید کرد، بێ هۆکار و بێ هیچ بیانوویەک. دەبێ ئێمە پەیوەندیمان لەگەڵ تورکیا باش ببێتەوە، دەشمانەوێت پەیوەندیمان باش بێت. کێشەکەی تورکیا ئەوەیە کە ئێمە بۆچوونی جیاوازمان هەیە و لە رۆژئاوا دۆخەکە بە جیاواز دەبینین، ئێمە شتێک دەبینین و ئەوان شتێکی دیکە دەبینن. ئێمە پەیوەندیمان لەگەڵ پەکەکە وەکو ئەوەی باس دەکرێت نییە، چەند حیزبێک هەن لەنێو سلێمانی کە گلەییان لێدەکرێت ئەمڕۆ دایخەن. چوومەتە بەغدا لەگەڵ فایەق زێدان قسەم کردووە، گوتومە ئەو حیزبانە مۆڵەتیان هەیە، ئەرێ حیزبێک دەتوانێت بچێت حیزبێکی دیکە دابخات کە مۆڵەتی هەیە، دەڵێت نەخێر. باشە بۆ تورکیا تانە لەو حیزبانە نادات و حکومەتی هەرێمی کورستان بڕیار دەربکات و بێن دایبخەن؟ من بۆ دایبخەم. دامەزراوە هەیە لەنێو سلێمانی، دەڵێن ئەمە پەکەکەیە، من نازانم پەکەکەیە یان نا، بەڵام هەموویان فەرمین و مۆڵەتیان هەیە، هەندێکیان لە هەولێر مۆڵەتیان هەیە. باشە من بە چ مافێک بڕۆم ئەو شوێنانە دابخەم؟ منیش پێموایە کێشەکان لەگەڵ تورکیا بە گفتوگۆ چارەسەر دەکرێت، کورد عینادن، بە پاڵەپەستۆ شت ناکەین. من بەیانیان هەڵدەستم درۆنێک لە سەرەوە دەسووڕێتەوە و من هەندێ جار سڵاوێکی لێدەکەم. ئێمە حەز دەکەین بە گفتوگۆ شتەکان حل بکەین. دڵنیام سوێنێک هەیە لە نێوەڕاست کە ئێمە بتوانین یەک بگرینەوە، بەڵام کە ئامادە نەبن قسە بکەن و دابنیشن، ئێمە چی بکەین؟ ئێمە بۆ هەموو گفتوگۆیەک ئامادەین، بۆ چارەسەری هەموو کێشەیەک، بۆ چارەسەری پەکەکەش ئێمە دەتوانین هاوکاریان بین، هەموو لایەک دەتوانێت هاوکاریان بێت. پارتیش دەتوانێت هاوکاریان بێت. چوار ساڵ پێش ئێستا کاک مەسعود سوپاسی کردن، نا چوار ساڵ نەبوو، لە شەڕی داعش و لە شەڕی مەخموور کاک مەسعود سوپاسی کردن. من خۆم لە مەخموور بووم و بینیم ئەوان لەملاوە دەهاتنە خوارەوە، ئەمریکی لێبوو، وڵاتێکی دیکەشی لێبوو. ئێمە دەمانەوێت لەگەڵ هەموو لایەک رێککەوین. با لەبیرت نەچێت، ئەوە یەکێتی بوو کە پەیوەندی پارتی لەگەڵ تورکیا باش کرد. مام جەلال بوو. ئێمە دەتوانین چۆن مام جەلال هاوکاری کردن ئاگرەکەی پەکەکە کەم ببێتەوە، ئێمەش ئامادەین بۆ هەموو هاوکارییەکی تورکیا ، بەڵام شتی مەعقول. چەند شتێک هەیە داوامان لێبکەن، ناتوانین جێبەجێی بکەین، قەت نەمانتوانیوە، مام جەلال نەیکردووە بۆ ئێمە بیکەین؟ 

من پێم ناخۆشە ئەوە چەند جارێکە کاک شاڵاو پێم دەڵێت، وەزیری بەرگری هەڕەشەی لێکردووی و فڵانە لایەن هەڕەشەی کردووە، هەڕەشەی چی؟ بۆ؟ ئێمە نامانەوێ کێشەمان لەگەڵ هیچ وڵاتێک هەبێت، بەڵام بەخوا ئێمە بە گوشار و هەڕەشە و درۆن گفتوگۆ ناکەین، ئەوە گفتوگۆ نییە، هەر ئەو پرۆسەیە هەڵەیە، ئەوە مەکینەی شەڕە، تۆ مەکینەی شەڕ چۆن لەگەڵ وڵاتێک بەکاردەهێنیت، کە لەگەڵی لە شەڕدا نیت.

 

 

بافڵ تاڵەبانی: یەکێتی لە هەستانەوەیە، یەکێتی بە زووترین کات هەڵبژاردنی دەوێت، بۆیە دەیەوێت هەڵبژاردن بکات، تاوەکو باشتر خزمەتی میللەتەکەمان بکەین، بەتایبەت گەنجەکانمان، حەزیش دەکەم ئێوە چاودێر بن ، بزانن ئەو شتانەی یەکێتی دەیڵێت، دەیانکات. لە پرسی ئەمنی و پاراستنی یاسا و ئازادی ئێوە چاودێرمان بن. دڵنیاتان دەکەم رۆژ بە رۆژ گۆڕانکاری لەو شوێنانە دەبێت کە ئێمە دەتوانین کاریگەریمان لەسەری هەبێت. دووبارەشی دەکەمەوە، ئێمە ئامادەین لاپەڕەیەکی تازە لەگەڵ هەموو حیزب و لایەنێک، هەم لە عێراق و بەتایبەت لە کوردستان، بە سیاسەتێکی تازە هەڵبدەینەوە، ئیشەڵڵا لایەنەکانیش بۆ ئەوە ئامادەن. ئاخر شت کە پێویست دەکات بیکەین، حەقە هەر هەموومان داوای لێبووردن لە میللەتەکەمان بکەین کە هێشتوومانە کێشەی کەسی و حیزبی، ژینگەیەک دروستبکات کە وەکو پێویست نەمانتوانیبێت خزمەتیان بکەین. بۆیە من لێرە حەزدەکەم ئەوە بکەم و سوپاسێکی تایبەت بۆ هەموو هاوڕێ بیانییەکانمان کە تەقریبەن شێت بوونە بەدەستمانەوە، بەڵام خەمیان نەبێت، ئیشەڵڵا ئێمە هەوڵدەدەین دۆخەکە باش بکەینەوە. ئاخر شتیشم ئەوەیە سوپاسی جەنابت و ئەم بەڕێزانە بکەم کە دەرفەتیان پێدام دابنیشم و بیروبۆچوونی خۆمان روون بکەینەوە.