ئێران: سەردانی بافڵ تاڵەبانی پەیوەندیی بە رێککەوتنی ئەمنییەوە نییە
رووداو دیجیتاڵ
وەزارەتی دەرەوەی ئێران دەڵێت، بە بەرپرسانی عێراق و هەرێمی کوردستانیان راگەیاندووە، کاتی دیاریکراو بۆ چەککردنی حیزبەکانی رۆژهەڵاتی کوردستان درێژ ناکەنەوە و سەردانی سەرۆکی یەکێتیی نیشتمانیی کوردستانیش بۆ تاران، پەیوەندی بەو بابەتەوە نییە.
ناسر کەنعانی، گوتەبێژی وەزارەتی دەرەوەی ئێران ئەمڕۆ (دووشەممە، 11-09-2023) لە کۆنفرانسی رۆژنامەڤانیی هەفتانەیدا لە وەڵامی پرسیارێک لەبارەی پەیوەندیی سەردانی بافڵ تاڵەبانی، سەرۆکی یەکێتیی نیشتمانیی کوردستان بۆ تاران بە کاتی دیاریکراو بۆ جێبەجێکردنی رێککەوتنی ئەمنیی نێوان ئێران و عێراق، گوتی 28ـی خەرمانان (19ـی ئەیلوول) وادەی دیاریکراوە بۆ جێبەجێکردنی رێککەوتنی چەککردنی هێزەکانی رۆژهەڵاتی کوردستان و بە ئاشکرا و بە فەرمی لە لایەن بەرپرسانی پەیوەندیداری ئێرانەوە بە بەرپرسانی عێراق راگەیێندراوە، وادەکە درێژ ناکرێتەوە.
ناسر کەنعانی دەڵێت، "حکومەتی عێراق تاوەکو ئێستا هەندێک هەنگاوی باشی ناوە و جەختی لەسەر پابەندی خۆی بەو رێککەوتنەوە کردووەتەوە"، هەروەها دەڵێت، محەممەد شیاع سوودانی، سەرۆکوەزیرانی عێراق لە رۆژانی رابردوودا قسەی باشی لەسەر پابەندی ئەو وڵاتە بە جێبەجێکردنی رێککەوتنەکە کردووە.
گوتەبێژی وەزارەتی دەرەوەی ئێران لەبارەی سەردانی بافڵ تاڵەبانی بۆ تاران گوتی، سەردانی سەرۆکی یەکێتیی نیشتمانیی کوردستان بۆ تاران "لە چوارچێوەی گفتوگۆ و هاوکاری ئەرێنیی دوو لایەنەی نێوان کۆماری ئیسلامیی ئێران و هەرێمی کوردستانی عێراقدایە و هیچ پەیوەندیی بە وادەی دیاریکراو و قسەکردن لەسەر درێژکردنەوەی کاتی دیاریکراوەوە نییە."
رۆژی 19ـی ئاداری 2023 لە بەغدا، عێراق و ئێران کۆنووسێکی ئەمنیی هاوبەشیان واژۆکرد کە قاسم ئەعرەجی، راوێژکاری ئاسایشی نیشتمانیی عێراق و عەلی شەمخانی، سکرتێری ئەوکاتی ئەنجوومەنی ئاسایشی نیشتمانیی ئێران واژۆکەیان کرد. یاداشتەکە هاوئاهەنگی لەڕووی پاراستنی سنووری هاوبەشی نێوان هەردوو وڵاتی لەخۆگرتووە.