لە شائابادی کرماشان بەهۆی تەقینی بۆریی گازی ماڵانەوە دوو کەس گیانیان لەدەستدا

 

ئەمڕۆ یەکشەممە، 11ـی ئابی 2024، کاژێر 14:39 خولەکی دوانیوەڕۆ لە شەقامی ئاوینیی شاری شائابادی سەربە پارێزگای کرماشانی رۆژهەڵاتی کوردستان و لە نزیک بەڕێوەبەرایەتیی خۆشبژیویی شارەکە، بۆریی گازی ماڵان تەقییەوە و بەهۆیەوە دوو ماڵ بە تەواوی رووخان.

 

محەممەدعەلی خودایی، بەڕێوەبەری تەندروستیی شائاباد رایگەیاند، بەپێی ئامارە سەرەتاییەکان، لە رووداوەکەدا دوو کەس گیانیان لەدەستداوە و 8 کەسی دیکەش بریندار بوون کە لەلایەن تیمەکانی فریاکەوتنەوە بۆ نەخۆشخانە و ناوەندە تەندروستییەکان گوێزرانەوە.

 

بە گوتەی بەڕێوەبەری تەندروستیی شائاباد، دۆخی دوو لە برینداران قورسە و بەمەبەستی وەرگرتنی چارەسەر لە نەخۆشخانە خەوێندراون.

 

مەسعود قەلعەسفیدی، بەڕێوەبەری فریاکەوتنی شاری شائاباد رایگەیاند، رووداوەکە بەهۆی دزەکردنی گاز لە بۆرییەوە بووە و بەهۆی داڕمانی باڵاخانەکان، ئەگەری زیادبوونی ژمارەی گیانلەدەستدان و بریندارانی رووداوەکە هەیە.

 

بە گوتەی قەلعەسفیدی، لەئێستادا تیمەکانی فریاکەوتن بە دوو ئەمبوڵانسەوە و تیمێکی ئاگرکوژێنەوە لە شوێنی رووداوەکە ئامادەن.

 

بەپێی هەندێک سەرچاوەی خۆجێی، لە رووداوەکەی ئەمڕۆی شاری شائاباد دا، پێنج کەس گیانیان لەدەستداوە، بەڵام لایەنە فەرمییەکان تا ئێستا گیانلەدەستدانی دوو کەسیان پشتڕاست کردووەتەوە.