رووداو دیجیتاڵ
بەهۆی تەقینی بۆریی گازی ماڵانەوە لە شاری شائابادی (ئیسلام ئاوای رۆژئاوا) کرماشان، دوو کەس گیانیان لەدەستدا و 8 کەسی دیکەش بریندارن. بەڕێوەبەری فریاکەوتنی شارەکەش دەڵێت، ئەگەری بەرزبوونەوەی ژمارەی قوربانیان و بریندارانی رووداوەکە هەیە.
ئەمڕۆ یەکشەممە، 11ـی ئابی 2024، کاژێر 14:39 خولەکی دوانیوەڕۆ لە شەقامی ئاوینیی شاری شائابادی سەربە پارێزگای کرماشانی رۆژهەڵاتی کوردستان و لە نزیک بەڕێوەبەرایەتیی خۆشبژیویی شارەکە، بۆریی گازی ماڵان تەقییەوە و بەهۆیەوە دوو ماڵ بە تەواوی رووخان.
محەممەدعەلی خودایی، بەڕێوەبەری تەندروستیی شائاباد رایگەیاند، بەپێی ئامارە سەرەتاییەکان، لە رووداوەکەدا دوو کەس گیانیان لەدەستداوە و 8 کەسی دیکەش بریندار بوون کە لەلایەن تیمەکانی فریاکەوتنەوە بۆ نەخۆشخانە و ناوەندە تەندروستییەکان گوێزرانەوە.
بە گوتەی بەڕێوەبەری تەندروستیی شائاباد، دۆخی دوو لە برینداران قورسە و بەمەبەستی وەرگرتنی چارەسەر لە نەخۆشخانە خەوێندراون.
مەسعود قەلعەسفیدی، بەڕێوەبەری فریاکەوتنی شاری شائاباد رایگەیاند، رووداوەکە بەهۆی دزەکردنی گاز لە بۆرییەوە بووە و بەهۆی داڕمانی باڵاخانەکان، ئەگەری زیادبوونی ژمارەی گیانلەدەستدان و بریندارانی رووداوەکە هەیە.
بە گوتەی قەلعەسفیدی، لەئێستادا تیمەکانی فریاکەوتن بە دوو ئەمبوڵانسەوە و تیمێکی ئاگرکوژێنەوە لە شوێنی رووداوەکە ئامادەن.
بەپێی هەندێک سەرچاوەی خۆجێی، لە رووداوەکەی ئەمڕۆی شاری شائاباد دا، پێنج کەس گیانیان لەدەستداوە، بەڵام لایەنە فەرمییەکان تا ئێستا گیانلەدەستدانی دوو کەسیان پشتڕاست کردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ