لە تەقتەق منداڵێکی شەش ساڵان خنکا و چارەنووسی یەکێکی دیکە نادیارە
رووداو دیجیتاڵ
بەرێوبەری بەرگریی شارستانیی کۆیە دەڵێت، تیمەکانیان لە زێی بچووک لە سنووری شارۆچکەی تەقتەق، تەرمی منداڵێکی شەش ساڵانیان دۆزیوەتەوە و سەرقاڵی بەدواداگەڕانن بۆ دۆزینەوەی منداڵێکی دیکە کە هێشتا چارەنووسی دیارنییە.
عەمید گۆران ئەحمەد سماقە، بەڕێوەبەری بەرگریی شارستانیی قەزای کۆیەی سەر بە پارێزگای هەولێر لە لێدوانێکدا بە تۆڕی میدیایی رووداوی راگەیاند: "دوێنێ 10ی ئابی 2021، ئاگادارکراینەوە لە رووداوی خنکان لە زێی بچووک لە تەقتەق و لە کاژێر 6ی ئێوارە و دوای گەڕانێکی زۆر توانیمان تەرمی منداڵێکی شەش ساڵان بەناوی رامان محەممەد بدۆزینەوە؛ هەروەها تیمەکانمان بەدوای منداڵێکی دیکەی تەمەن 11 ساڵدا دەگەرێن کە هێشتا دیارنییە خنکاوە یان خۆی شاردووەتەوە یان لەشوێنێکی دیکەیە".
رائید سەرکەوت کاڕەش، گوتەبێژی بەرگریی شارستانیی هەولێر بە تۆڕی میدیایی رووداوی راگەیاند، لە ساڵی 2021دا لە سنووری پارێزگای هەولێر 14 کەس خنکاون.