ڤیدیۆی کەوتنی کرێنەکە
رووداو دیجیتاڵ
سەرەتای ڤیدیۆکە دیمەنی کەوتنەخوارەوەی کرێن تاوەری پڕۆژەیەکی نیشتەجێبوون لە سلێمانی دەبینن کە بەهۆیەوە سێ کرێکار گیانیان لەدەستدا و یەکێکیش برینداربوو.
رووداوەکە رۆژی یەکشەممە، 11-6-2023، لە پڕۆژەیەکی نیشتەجێبوون لە گەڕەکی راپەڕینی شاری سلێمانی روویدا. داروین سیروان، شایەتحاڵی رووداوەکەیە و گوتی، "خێرا رامکرد بۆ لای کرێنەکە، بینیم سێ کرێکار لەژێر کرێنەکەدا بوون و مردبوون، دووانی دیکەش برینداربوون کە یەکێکیان برینەکانی سەختبوو و خەریکبوو دەمرد. کرێنەکەش لەکاتی بەرزکردنەوەیدابوو کە کەوتبوو."
هێدی سەلام، ئەندازیاری ئەو پڕۆژە نیشتەجێبوونەیە کە کرێنەکەی تێدا تێکشکا، دەڵێت: دوێنێ کرێنەکە بەرزکرابووەوە و "هیچ گرفتێکی نەبوو،" ئەمڕۆش کاری تێداکراوە، ئەمڕۆش کرێکارەکان هاتوون کاریان تێدا دەکرد، بەڵام کەوت.
لێکۆڵینەوە لە رووداوەکە کراوە و هێشتا ئەنجامەکەی لەلایەن بەرگریی شارستانییەوە رانەگەیێندراوە، بەڵام سەندیکای کرێکارانی بیناسازی هۆکاری رووداوەکە ئاشکرادەکات.
عوسمان زیندانی، سەرۆکی سەندیکای کرێکارانی بیناسازیی کوردستان رایگەیاند، کەوتنی کرێن تاوەر چەند هۆکارێکی هەیە، یان زەوییەکەی فشەڵ و تەڕە و دادەچۆڕێت، یان باران و رەشەبایەکی بەهێز هاوسەنگی تێکدەدات، "ئێستاش هیچ کام لەم هۆکارانە نین، بۆیە هۆکاری کەوتنی کرێن تاوەرەکە هاوسەنگی تێکچوونە بەهۆی باش نەبەستنی ئاسنەکان، کۆنی، قورسی و باش نۆژەننەکردنەوەوەیە."
کرێکارەکان ناویان حیکمەت ئەحمەد، عەبدولسەلام یونس و سادق محەممەدن، کە تەمەنیان 49 ساڵ، 38 ساڵ و 37 ساڵن، هەرسێکیان خەڵکی موسڵن، بریندارەکەش محەممەدی تەمەن 46 ساڵە و خەڵکی سووریایە. بە گوتەی گوتەبێژی تەندروستیی سلێمانی، باری تەندروستیی بریندارەکە ناجێگیرە.
بەپێی ئاماری سەندیکای کرێکارانی کوردستان، لە ماوەی شەش مانگی رابردوودا لە سلێمانی 11 کرێکار گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ