رۆژانی جەژن کوشتارگەکانی هەرێمی کوردستان دادەخرێن؛ 'دووکان نییە گۆشت بکڕین'

 

رووداو لە بەدواداچوونی بەدوای بابەتەکە، لەنێو بازاڕی سلێمانی دوو هاوژینی بینی، ئەوان باسیان لەوەکرد، میوانیان هەیە و چوونەتە بازاڕ گۆشت بکڕن، بەڵام دووکانەکان داخراون و ئەمەش وایکردووە بەدەستی بەتاڵ بگەڕێنەوە. 

 

سروە حەسەن، کابانی ماڵە بە رووداوی گوت، "هەموو گۆشتفرۆشەکان داخراون، نابێت بەو جۆرەبێت، ئەم شارە شارێکی گەورەیە، دەبێت دووکانەکان بکرێنەوە، بۆیە پێم ناخۆشە، پێشووتریش چونکە مووچەمان وەرنەگرتبوو، نەمانتوانی گۆشت زۆر بکڕین و بۆ جەژن دایبنێین، دواتریش کە مووچەمان وەرگرت، ئێستا هاتووین گۆشت بکڕین، بەڵام دووکان نییە."

 

نزار محەممەد، خانەنشینە و دەڵێت، "جەژنە و دووکانەکان نەکراونەتەوە، بەڵام دەبوو کراوەبن، هاتین گوتمان بەڵکو کەمێک گۆشت بکڕین ئەویش نەبوو."

 

لە هەموو شارەکانی هەرێمی کوردستان هەمان گرفت هەیە، کوشتارگەکان تاوەکو رۆژێک پێش جەژن کاردەکەن و لە رۆژانی جەژن کارناکەن، هەر بۆیە گۆشتفرۆشەکانیش گۆشتیان نامێنێت و دایدەخەن.

 

ئاسۆ عومەر، نوێنەری گۆشتفرۆشەکانی سلێمانی بە رووداوی راگەیاند، "عادەت وایە هەموو گۆشتفرۆشەکان لە رۆژانی جەژن داخراون، بەهۆی داخستنی کوشتارگەوە، کە کوشتارگەش نەبێت ناتوانین ئاژەڵ سەربڕین، چونکە بەبێ مۆر ئاژەڵ بفرۆشین لەلایەن لیژنەکانی چاودێریی بازرگانی و قایمقامیەتەوە سزادەدرێین."

 

بەپێی دوایین داتای دەستەی ئاماری هەرێمی کوردستان، ساڵانە نزیکەی ملیۆنێک ئاژەڵی وەک مەڕ و بزن و رەشەوڵاخ لەکوشتارگەکانی هەرێمی کوردستان سەردەبڕدرێن و دەخرێنە بازاڕەوە.

 

کردنەوەی گۆشتفرۆش و کوشتارگەکان پێویستی بە بڕیارێکی حکومەتی خۆجێیی پارێزگاکانە، بۆئەوەی هاونیشتمانییان بتوانن هەرکاتێک بێت گۆشت بکڕن.

 

بەدرێژایی هەموو جەژنەکانی ساڵانی پێشوو دووکانی گۆشتفرۆشەکان داخراون، ئەمەش بەهۆی داخرانی کوشتارگە و کەمی فرۆشەوە، بۆیە گرفت بۆ هاونیشتمانییانە دروستبووە و داواکارن لە رۆژانی جەژندا بەشێک لە دووکانی گۆشتفرۆشەکان کراوەبن.