هۆشداریی دروستبوونی لافاو لە باشووری کوردستان دەدرێت

 

بارانبارین لە دوێنێوە بەشێوەی لاواز هەرێمی کوردستانی گرتووەتەوە؛ پێشبینی دەکرێت لە دوایین کاژێرەکانی ئەمشەوەوە بەهێز بێت و رۆژی چوارشەممە چەقی شەپۆلەکە بێت.

 

دیلان رەشاد، گوتەبێژی وەزارەتی گواستنەوەی هەرێمی کوردستان ئەمڕۆ سێشەممە 11-04-2023 بە تۆڕی میدیایی رووداوی گوت، بارانبارین سەرتاسەری هەرێمی کوردستان دەگرێتەوە و کاریگەری لە دوای نیوەڕۆی سبەی چوارشەممە زیاتر دەبێت و بارانی بەلێزمە دەبارێت.

 

هەروەها لە راگەیێندراوێکدا کە رۆژی سێشەممە 11ـی نیسانی 2023 بڵاوکراوەتەوە، کەشناسیی هەرێمی کوردستان سەبارەت بە کەشوهەوای سبەی دەڵێت: "سبەی چوارشەممە لە رۆژئاوای هەرێمی کوردستان و سنووری پارێزگای دهۆک بارانی بەلێزمە دەبارێت و هەورە برووسکەی لەگەڵ دەبێت؛ کاریگەرییەکەی لە دوای نیوەڕۆوە درێژ دەبێتەوە بۆ سنووری پاڕیزگای هەولێر، ئیدارەی سەربەخۆی سۆران، ناوچە شاخاوییەکان و سەنتەری پارێزگای هەولێر، دواتر درێژ دەبێتەوە بۆ سنووری پارێزگاکانی سلێمانی، هەڵەبجە و کەرکووک." 

 

 

محەممەد کەمال، شارەزای کەشناسی ئەمڕۆ سێشەممە بە رووداوی گوت، کاریگەریی شەپۆلی بارانبارین لە ئەمشەوەوە دەستپێدەکات؛ گوتیشی: "چەقی شەپۆلەکە هەولێر، سلێمانی، دهۆک، هەڵەبجە و کەرکووک دەبێت." 

 

بەگوتەی ئەو کەشناسە، چوار پارێزگاکەی هەرێمی کوردستان و ئیدارە سەربەخۆکان لە سبەی دوای نیوەڕۆوە بارانی بەلێزمەیان تێدا دەبارێت و ئەگەر روودانی لافاو هەیە. 

 

هاوکات ئاراس جەبار، شارەزای کەشناسی ئەمڕۆ سێشەممە بە تۆڕی میدیایی رووداوی گوت: "بۆ ئەمشەویش گۆڕانکاری روویداوە و بارانی بەهێز دەبارێت، بەتایبەت لە پارێزگاکانی سلێمانی و کەرکووک و ئیدارەکانی راپەڕین و گەرمیان." 

 

ئاراس جەبار ئاماژەی بەوەشکرد، سبەی لە کاژێرەکانی ئێوارەوە تاوەکو پاشیڤ و نزیک کاژێر 05:00ـی بەرەبەیان ئەگەری لافاو لە هەموو هەرێمی کوردستان بەهێزە؛ گوتیشی: "شەپۆلەکە لە پێنجشەممە لاواز دەبێت و ئەو رۆژە مەترسی بەرزبوونەوەی ئاوی لێناکرێت و هەینی بە تەواوی کۆتایی دێت."  

 

 

بۆ رووبەڕووبوونەوەی مەترسییەکانی لافاو، بەگوتەی بەرگریی شارستانیی پارێزگاکانی هەرێمی کوردستان بۆ رووداو، تیمی جیاوازیان پێکهێناوە و لە ئامادەباشیدان. 

 

بەگوێرەی کەشناسیی هەرێمی کوردستان، سبەی 3 بۆ 5 پلە، پلەی گەرما بەرزدەبێتەوە و بەرزترین پلەی گەرمای پێشبینیکراویش لە باشووری کوردستان بەمشێوەیەی خوارەوە دەبێت:

 

هەولێر؛ 20 پلەی سیلیزی

سلێمانی؛ 20 پلەی سیلیزی

دهۆک؛ 18  پلەی سیلیزی

کەرکووک؛ 23 پلەی سیلیزی

هەڵەبجە؛ 21 پلەی سیلیزی

زاخۆ؛ 17 پلەی سیلیزی

سۆران؛ 17 پلەی سیلیزی

گەرمیان؛ 26 پلەی سیلیزی