رووداو دیجیتاڵ
سوپای تورکیا کوژرانی سەربازێک و برینداربوونی سەربازێکی دیکەی لە ئەنجامی رووبەڕووبوونەوەیەک لە دژی گەریلاکانی پەکەکە لە ناوچەکانی ئۆپەراسیۆنی ناسراو بە چنگ – قوفڵ لە هەرێمی کوردستان راگەیاند.
وەزارەتی بەرگریی تورکیا ئەمشەو، 11ـی کانوونی دووەمی 2024، لە هەژماری فەرمیی خۆی لە تۆڕی کۆمەڵایەتیی ئێکس، کوژرانی سەربازێک بەناوی سامەت ئاسڵان و برینداربوونی سەربازێکی دیکەی لە ئەنجامی هێرشێکی گەریلاکانی پەکەکە لە خاڵی سفری سنووری باشووری کوردستان لەگەڵ باکووردا، راگەیاند.
بەمەش، وەک لە راگەیێندراوەکانی وەزارەتی بەرگریی تورکیادا هاتووە، ژمارەی ئەو سەربازانەی سوپای تورکیا لە دەستپێکی ئۆپەراسیۆنەکەوە لە هەرێمی کوردستان کوژراون، گەیشتە 122 سەرباز.
رۆژی 10ـی کانوونی دووەمی 2024، ناوەندی چاپەمەنیی و راگەیاندنی هەپەگە، کوژرانی دوو سەربازی سوپای تورکیا و برینداربوونی سەربازێکی دیکەی لە ناوچەی زاپ بڵاوکردەوە و رایگەیاند، لە 48 کاژێردا نۆ جار هێرشیان کردووەتە سەر پێگەکانی تورکیا.
ئەم شەڕ و پێکدادانە لە چوارچێوەی ئۆپەراسیۆنێکدایە، کە تورکیا ناوی ناوە چنگ- قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکردووە و تائێستاش بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ