لە هەرێمی کوردستان چوار وێستگەی بەرهەمهێنانی کارەبا دەکرێنەوە

 

بەڕێوەبەرانی کارەبای سۆران، راپەڕین و گەرمیان دەڵێن، زەوی بۆ پڕۆژەکان دابینکراوە، بەڵام دیار نییە کۆمپانیا کەی دەستبەکاردەبێت و وێستگەکان دەکرێتەوە.

 

رۆژی سێشەممە، 10-1-2023، حکومەتی هەرێمی کوردستان رایگەیاند، هەرێمی کوردستان هەنگاو دەنێت بۆ بەرهەمهێنانی کارەبا لە وزەی پاک، بۆ ئەو مەبەستەش بڕیاری دامەزراندنی چوار وێستگە لە زاخۆ، سۆران، گەرمیان و راپەڕین دراوە. 

 

رۆژی چوارشەممە، 11-1-2023، عەلی محەممەد عەلی، بەڕێوەبەری گشتیی کارەبای راپەڕین بە تۆڕی میدیایی رووداوی گوت: "ئەو وێستگەیە لە قەڵادزێیە و زەویی پێویستی بۆ تەرخانکراوە، رۆژانە توانای بەرهەمهێنانی 50 مێگاوات کارەبای هەیە و دەکرێت زیاتریش دابین بکات، ئەگەر وەزارەت داوای بکات تاوەکو 100 بۆ 200 مێگاوات کارەبا دابین دەکات."

 

عەلی محەممەد عەلی گوتیشی: "ئەو وێستگەیە بە تەکنیکێکی نوێ و لە رێگەی وزەی نوێبووەوە کارەبا دابین دەکات."

 

بە گوتەی بەڕێوەبەری کارەبای راپەڕین: "ئەو وێستگەیە دراوەتە کۆمپانیایەک و ئێستا کۆمپانیاکە لە قۆناخی دیزاین و تێستدایە، بۆیە دیار نییە کەی دەستبەکاردەبن." 

 

رۆژی چوارشەممە، 11-1-2023، فەیسەڵ حوسێن، بەڕێوەبەری دابەشکردنی کارەبای سۆران بە تۆڕی میدیایی رووداوی گوت: "ئەو وێستگە نوێیەی کە لە رێگەی وزەی پاک کارەبا دابین دەکات لە مانگی ئاداری 2021ـەوە بەردی بناخەی دانراوە و زەویی بۆ پڕۆژەکە دابین کراوە."

 

سەبارەت بە توانای وێستگە نوێیەکە، بەڕێوەبەری کارەبای سۆران گوتی: "وێستگەکە رۆژانە 100 مێگاوات کارەبا دابیندەکات و لە رێگەی وزەی شاراوە واتا لە رێگەی ئاوەوە کارەبا بەرهەمدەهێنێت، ئەوەش تەکنیکێکی نوێیە لە هەرێمی کوردستان و سووتەمەنی ناوێت تەنیا کۆگەیەکی ئاوی پێویستە."

 

لە گەرمیانیش زەوی بۆ پڕۆژەکە دابین کراوە، بەڵام ئەو کۆمپانیایەی وێستگەکە بنیات دەنێت، دیار نییە کەی دەستبەکار دەبێت؟

 

رۆژی چوارشەممە، 11-1-2023، حازم کەریم، بەڕێوەبەری گشتیی کارەبای گەرمیان بە تۆڕی میدیایی رووداوی راگەیاند: "نازانین کۆمپانیاکە چین و کێن و کەی کار دەکەن، وەزارەتی کارەبا بۆ خۆی سەرپەرشتیی ئەو وێستگەیە دەکات." گوتیشی، وێستگەکە لە ناحیەی باوەنوورە و رۆژانە توانای بەرهەمهێنانی 50 مێگاوات کارەبای هەیە.

 

 

ئەنوەر کربێت، بەڕێوەبەری کارەبای زاخۆ بە تۆڕی میدیایی رووداوی گوت: "شەش مانگ زیاترە زەوی بۆ ئەو وێستگەیە دابینکراوە، بەڵام تائێستا کۆمپانیا دەستی بە کارکردنی نەکردووە و پڕۆژەکە وەزارەتی کارەبا سەرپەرشتی دەکات."

 

بە گوتەی بەڕێوەبەری کارەبای زاخۆ: "ئەو وێستگەیە کارۆئاویی نییە، ناوی ویستگەی هایدرۆپڵاسە و تەکنیکێکی نوێیە و لە کەم وڵاتی جیهان هەیە، راستە ئاوی دەوێت، بەڵام تەنیا یەکجار بۆ کارکردنی ئاوی تێدەکرێت و دەمێنێتەوە". گوتیشی کە وێستگەکە رۆژانە توانای بەرهەمهێنانی 100 مێگاوات کارەبای هەیە.