رووداو دیجیتاڵ
لە 24 کاژێری رابردوودا زۆرترین باران لە ناوچەی سەرسنگ لە سنووری پارێزگای دهۆک باریوە، کە 22.5 مللیمەتر بووە. کەشناسێکیش دەڵێت، بارانبارین لە رۆژی دووشەممە لاواز دەبێت و رۆژی چوارشەممە باران لە تەواوی شارەکاندا دەبارێت.
لە راگەیێندراوێکدا ئەمڕۆ (یەکشەممە، 10-12-2023) کەشناسیی هەرێمی کوردستان رایگەیاند، لە 24 کاژێری رابردوودا و لە کاژێر 09:00ـی بەیانیی دوێنێ بۆ کاژێر 09:00ـی بەیانی ئەمڕۆ، زۆرترین بڕی بارانبارین لە پارێزگای دهۆک تۆمارکراوە، پاشان پارێزگای هەولێر و دواتر پارێزگای سلێمانی، بەڵام لە پارێزگای هەڵەبجە باران نەباریوە.
بڕی بارانی باریو لە هەندێک لە ناوچەکانی باشووری کوردستان، لە 24 کاژێری رابردوودا بەمشێوەیە بووە:
پارێزگای هەولێر: هەولێر 0.4 مللیمەتر، سۆران 3.2 مللیمەتر، هیران 4.5 مللیمەتر، شەقڵاوە 2.5 مللیمەتر، رواندز 5.7 مللیمەتر، مێرگەسۆر 6.2 مللیمەتر، سیدەکان 8.5 مللیمەتر.
پارێزگای سلێمانی: سلێمانی 0، قەڵادزێ 1 ملیمەتر، هەڵشۆ 3.2 ملیمەتر.
پارێزگای دهۆک: دهۆک 2 مللیمەتر، زاخۆ 10.8 مللیمەتر، ئاکرێ 3.2 مللیمەتر، بامەڕنی 15 مللیمەتر، مانگێش 7 مللیمەتر، کانی ماسێ 17 مللیمەتر، ئامێدی 16 مللیمەتر، دینارتە 6.4 مللیمەتر، باتیفا 14.6 مللیمەتر، سەرسنگ 22.5 مللیمەتر، باعەدرێ 5 مللیمەتر، چەمانکێ 11 مللیمەتر و زاویتە 7 مللیمەتر.
کەشناسی: ئەمڕۆ لە ناوچە شاخاوییەکان نمەبارانە
لە راگەیێندراوێکی دیکەدا، کەشناسیی هەرێمی کوردستان بڵاویکردەوە، ئەمڕۆ لە ناچاو شاخاوییەکاندا نمەباران دەبارێت و بەراورد بە دوێنێ پلەی گەرما "کەمێک" بەرز دەبێتەوە.
لەبارەی کەشوهەوای سبەی (دووشەممە)، کەشناسی دەڵێت، "ئاسمان نیمچەهەور دەبێت و ئێوارە دەگۆڕێت بۆ هەوری تەواو؛ لە ناوچە شاخاوییەکاندا نمەباران دەبارێت و لە شەودا کاریگەری شەپۆلێکی باران روو لە ناوچەکەمان دەکات و لە درەنگی شەودا باران دەبارێت."
ئاراس جەبار، شارەزای کەشناسی ئەمڕۆ بە تۆڕی میدیایی رووداوی گوت، "سبەی شەو بۆ بەرەبەیانی سێشەممە دڵۆپە باران لە چەند ناوچەیەک دەبارێت؛ رۆژی سێشەممە باران بە لاواز و پچڕپچڕی بەردەوام دەبێت، بەڵام چوارشەممە باران زۆربەی ناوچەکان دەگرێتەوە."
ئاراس جەبار ئاماژەی بەوەکرد، رۆژی چوارشەممە لە پارێزگاکانی هەولێر و دهۆک بارانی مام ناوەند دەبارێت. گوتیشی، "بارانی چوارشەممە کاریگەریی زیاتری لەسەر پارێزگاکانی سلێمانی، هەڵەبجە و ئیدارەی گەرمیان دەبێت بەراورد بە دهۆک و هەولێر. بەرەبەیانی پێنجشەممە شەپۆلەکە بە تەواوی کۆتایی دێت".
کەشناسیی هەرێمی کوردستان ئاماژەی بەوەش کردووە، سبەی بەراورد بە ئەمڕۆ پلەی گەرما کەمێک بەرز دەبێتەوە و پلەی گەرما بەمشێوەیە دەبێت:
هەولێر: 21 پلەی سیلیزی
سلێمانی: 20 پلەی سیلیزی
دهۆک: 19 پلەی سیلیزی
کەرکووک: 23 پلەی سیلیزی
هەڵەبجە: 20 پلەی سیلیزی
زاخۆ: 18 پلەی سیلیزی
گەرمیان: 24 پلەی سیلیزی
حاج ئۆمەران: 12 پلەی سیلیزی
سۆران: 14 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ