پێشبینیی دەکرێت شەپۆلێکی بارانبارین باشووری کوردستان بگرێتەوە

 

رۆژی شەممە، 10-12-2022، محەممەد کەمال، شارەزای کەشناسی بە تۆڕی میدیایی رووداوی گوت: "بەهۆی کاریگەریی نزمەپاڵەستۆی دەریای نێوەڕاست و هاتنی شێ لە دەریای سوورەوه، پێشبینی دەکەین شەپۆلێکی بارانبارین لە بەرەبەیانی چوارشەممە 14ـی ئەم مانگەوە باشووری کوردستان بگرێتەوه و لە هەندێک شوێن بەشێوەی لاواز بۆ مامناوەند باران ببارێت. بارانبارینەکە شەوی پێنجشەممە لەسەر هەینی کۆتایی دێت".

 

بە گوتەی ئەو کەشناسە، زۆرترین بڕی بارانبارین لە ناوچە شاخاوییەکانی ئیدارەی راپەڕین و دەوروبەری کەرکووک و رۆژهەڵاتی گەرمیان دەبێت.

 

هەر ئەمڕۆ شەممە، کەشناسیی هەرێمی کوردستان رایگەیاند، سبەی ئاسمان ساماڵ دەبێت لەگەڵ هەندێ پەڵە هەوری جیا جیا. پلەی گەرما نزیک دەبێتەوە لە تۆمارکراوی رۆژی پێشتر.

 

- هەولێر؛ 18 پلەی سیلیزی

- سلێمانی؛ 17 پلەی سیلیزی

- دهۆک؛ 18 پلەی سیلیزی

- کەرکووک؛ 21 پلەی سیلیزی

- هەڵەبجە؛ 18 پلەی سیلیزی

- زاخۆ؛ 18 پلەی سیلیزی

- سۆران؛ 16 پلەی سیلیزی

- گەرمیان؛ 22 پلەی سیلیزی