رووداو دیجیتاڵ
زیاتر لە 11 هەزار بریکاری حیزب و هەزار چاودێری رێکخراوی نێوخۆیی و نێودەوڵەتی چاودێریی هەڵبژاردنی پەرلەمانی کوردستان دەکەن.
کۆمیسیۆنی باڵای سەربەخۆی هەڵبژاردنەکانی عێراق دوا ئاماری بریکاری حیزبەکان، رێکخراو و کۆنسووڵخانەکان بۆ چاودێریی هەڵبژاردنی پەرلەمانی کوردستان بڵاوکردەوە، بەگوێرەی ئامارەکە، نزیکەی 11 هەزار بریکاری حیزبەکان و زیاتر لە هەزار و 100 چاودێری رێکخراوە نێوخۆییەکان دەچنە بنکە و ناوەندەکانی دەنگدان لە هەر چوار پارێزگای هەرێمی کوردستان.
حاکم عومەر ئەحمەد، سەرۆکی کۆمیسیۆنی باڵای سەربەخۆی هەڵبژاردنەکانی عیراق رایگەیاند، "کۆمیسیۆن لەوپەڕی ئامادەییدایە و بانگهێشتنامەمان بۆ سەرجەم رێکخراو و کۆنسووڵخانەکان ناردووە بۆ ئەوەی بێن و چاودێری هەڵبژاردن بکەن".
هەر بە گوێرەی ئەو ئامارەی کۆمیسیۆنی هەڵبژاردنەکان کە رۆژی 9-10-2024 بڵاویکردەوە، 13 کۆنسووڵخانە، 17 رێکخراو بە 1372 چاودێرەوە بەشدار دەبن، هەروەها 18 دەزگای میدیایی نێودەوڵەتی بە 75 رۆژنامەڤانەوە لە ناوەندەکانی دەنگدان رووماڵی هەڵبژاردن دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ