کارکردن لە چوار بەنداو دەستپێدەکاتەوە

 

رۆژی پێنجشەممە، 10ی تشرینی یەکەمی 2024، هیوا سەباح، سەرپەرشتیاری بەنداوی ئاقوبان بە تۆڕی میدیایی رووداوی راگەیاند: "لە سەرەتای ساڵی 2014ـەوە بەهۆی قەیرانی دارایی نەتوانرا پارەی بەڵێندەرانی ئەم چوار بەنداوە بدرێت، بۆیە کارکردن تێیاندا راگیرا، دوێنێ ئەم کێشەیە چارەسەرکرا و وەزارەتی دارایی بڕیاری دا بەپێی رێژەی جێبەجێکردنی پرۆژەکان، پارە بۆ بەڵێندەران خەرج بکرێت."

 

هیوا سەباح گوتی: " لەگەڵ بەڵێندەرەکان قسەمان کرد، کارکردن لە بەنداوی بانوو تاڵەبان دەستیپێکردەوە، بە زووترین کاتیش لە ئاقوبان دەستپێدەکاتەوە، بەنداوی شەوگێر دوێنێ کارەکانی تەواو بوو تەنیا هەندێک رێکاریی کۆتایی ماوە، بەم نزیکانەش کارکردن لە بەنداوی خۆرنەوازان دەستپێدەکاتەوە."

 

بە گوتەی سەرپەرشتیاری بەنداوی ئاقوبان، 96%ی کارەکانی بەنداوی ئاقوبان تەواوکراوە، بەمنزیکانە تەواو دەبێت، کارکردن لە بەنداویی بانوو تاڵەبانیش تەنیا 8٪ی ماوە و لە ماوەی نزیکەی 50 رۆژدا ئەویش تەواو دەکرێت.

 

بەنداوی ئاقوبان، رووبەرەکەی 400 هەزار مەتر چوارگۆشەیە، بەرزییەكەیشی 31 مەترە، توانای گلدانەوەی 3.2 ملیۆن مەتر سێجا ئاوی هەیە. هیوا سەباح گوتی: "ئێستا بەنداوەکە 2.2 ملیۆن مەتر سێجا ئاوی تێدایە."

 

تێچووی بەنداوی ئاقوبان 8 ملیار و 100 هەزار دینارە، بانوو تاڵەبان 8 ملیار دینارە، شەوگێر نزیکەی 5 ملیار دینارە و بەنداوی خۆرنەوازانیش نزیکەی 17 ملیار دینارە.