دۆسیەی گەندەڵیی 12 بەرپرسی شارەوانیی مهاباد رەوانەی دادگە کرا

 

 

ناسر عەتەباتی، سەرۆکی گشتیی دەسەڵاتی دادی پارێزگای ورمێ ئەمڕۆ پێنجشەممە رایگەیاند، دوای ئاگاداربوون لەوەی کە لە ئەنجوومەنی شار و دەزگەی هاوکاریی شارەوانیی مهاباد گەندەڵی کراوە، ئەو پرسە خرایە بەرنامەی کاری داواکاری گشتی و شۆڕشی مهاباد و بە ئەنجامدانی لێکۆڵینەوەی تەکنیکی، تۆمەتباران و لایەنە جۆراوجۆرەکانی ئەو گەندەڵییە دەستنیشان کران.

 

بە گوتەی ناسر عەتەباتی، لە ئەنجامی لێکۆڵینەوەکاندا 12 تۆمەتبار دەستنیشان کران، کە دوو لەوانە ئەندامی ئەنجوومەنی شار و چواریشیان فەرمانبەری دەزگەی هاوکاری شارەوانیی مهابادن.

 

عەتەباتی گوتی: "ئەو کەسانە بە وەرگرتنی بەرتیل، بەدەستهێنانی موڵک و ماڵ بە رێگەی نایاسایی، گواستنەوەی موڵک، قاچاخی خواردنەوە کحولییەکان، هەڵگرتنی چەکی سەربازی، ساختەکردنی واژۆی دەسەڵاتی دادوەری، خواردنەوەی مەی، ساختەکردن و بەکارهێنانی بەڵگەنامەی ساختە" تۆمەتبار کراون و دۆسیەکانیان رەوانەی دادگەی تاوان کراوە.

 

لە ساڵی 2022شدا، بە تۆمەتی گەندەڵیی 21 فەرمانبەر و بەرپرسی شارەوانیی مهاباد دەستگیر کرابوون کە 6 کەس لەوان ئەندامی خۆلی پێشووی ئەنجوومەنی شاری مهاباد بوون و بەو هۆیەشەوە کۆتایی هاوینی هەمان ساڵ ئەنجوومەنی شارەکە هەڵوەشایەوە.

 

مهاباد  سەر بە پارێزگای ورمێی رۆژهەڵاتی کوردستانە، کە ژمارەی دانیشتووانەکەی 240 هەزار کەسە و دوای ورمێ، خۆی و بۆکان چوارەم گەورەترین قەزای پارێزگاکەیە.