سەردانیکردنی گەشتیاران بۆ ناوچەکانی دەرکار و باتیفا 85% کەمیکردووە

 

 

 

سەگڤان حەمی، هاونیشتمانییە و دەڵێت، "ئێستا ناتوانین بچین بمێنینەوە. دەچین و نزیکەی نیو کاژێر دەمێنینەوە و ناتوانین لە گوندەکەی خۆماندا بمێنینەوە".

 

لە گوندی مۆنینێی سەر بە شارۆچکەی دەرکار سوپای تورکیا چیای مامتا بۆردوومان دەکات و زۆر جار دووکەڵی پاش بۆردوومانەکان لەو چیایە دیارن.

 

بە گوێرەی ئاماری بەڕێوەبەرایەتیی گەشتوگوزاری پارێزگای دهۆک، ساڵانە زیاتر لە 200 هەزار گەشتیار سەردانی ناوچە سنوورییەکانی هەردوو شارۆچکەی دەرکار و باتیفایان دەکرد، بەڵام ئەمساڵ بۆ 85% کەمبووەتەوە کە هۆکارەکەی بۆ شەڕ و پێکدادانەکانی ناوچەکە دەگەڕێننەوە.

 

خەڵات موحسین، هاونیشتمانییە و دەڵێت، "بەر لە 20 خولەک هاتینە ئێرە. بە چاوی خۆمان بینیمان کە تورکیا ناوچەکەی بۆردوومان دەکرد. ئەو شوێنە نزیکترین خاڵە بۆ زاخۆ، دەرکار و باتیفا".

 

هاونیشتمانییانی نزیکەی 100 گوندی سەر بە شارۆچکەکانی دەرکار و باتیفا لەبەر شەڕ و ئاڵۆزی لە ناوچەکانیاندا وەکو پێویست سەردانی گوندەکانیان ناکەن.