فەهمی بورهان: لە هەشت ساڵی رابردوودا نۆ گەڕەکی عەرەبی لە کەرکووک دروستکراون

 

رۆژی دووشەممە، 10-06-2024، فەهمی بوورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان، بۆ بەدواداچوونی دۆخی کەرکووک، سەردانی شارەکەی کرد، لەگەڵ بەرپرسانی یەکێتی نیشتمانی کوردستان، پارتی دیموکراتی کوردستان، بزووتنەوەی گۆڕان، یەکگرتووی ئیسلامی و کۆمەڵی دادگەری لە شارەکە کۆبووەوە. 

 

فەهمی بوورهان، بە تۆڕی میدیایی رووداوی گوت: "کورد بەشێک نییە لە دەسەڵاتی سیاسی و ئیدارەی شارەکە، دەبێ ئەو قۆناخە تێپەڕێنین. رۆژ لە دوای رۆژ رووبەری تەعریب، جیاکاریی لە خزمەتگوزاریی و داگیرکردنی زەوی کورد و تورکمان زیاتر دەبێت. پێویستە رێگە لەو تەعریبە بگیرێ، کە بە ئەجێندای جیاوازەوە لەو شارەکە هەیە".

 

فەهمی بوورهان زیاتر باسی کاریگەرییەکانی تەعریبی کرد و گوتی: "لە هەشت ساڵی رابردوودا نۆ گەڕەکی عەرەبی لە شاری کەرکووک دروستکراون، هەر گەڕەکێک جارێک، یاخود دوو جار لە گەڕەکی رەحیماوە و شۆڕجە گەورەترە. لە گەورەترین گەڕەکەکانی هەولێر، سلێمانی و دهۆکیش گەورەترە". 

 

سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان پێیوایە دیموگرافیای کەرکووک گۆڕاوە: "ئەوەش مەترسییەکی قوڵە و نابێ بەو ئاسانە تێپەڕێ، رۆژانە خەڵک لە دیالە، سەلاحەدین، نێوەڕاست و باشووری عێراق دەهێندرێنە کەرکووک و ناسنامە و فۆرمی خۆراکیان بۆ دروستکراوە.".

 

لەبارەی پۆستەکانی کەرکووک، فەهمی بورمان دەڵێت: "کورد لە هەشت ساڵی رابردوودا 110 پۆستی لە دەستچووە. ئەوەی دەکرێ ستەمێکی روونە لە جوگرافیای کەرکووک. ئەوەش تەنیا بە پارێزگاری بەوەکالەت نەکراوە".

 

سەبارەت بە کێشەی زەوییەکانی کەرکووک و جووتیاران، فەهمی بورهان گوتی: "کێشەکان بەکاتی چارەسەر کراون. هەموو کێشەکانی کەرکووک گرێدراوی یەکن، دەبێ پێکەوە چارەسەربکرێن. رووداوەکان، هەڵوێست و ئەجێندانەکان وای نیشان دەدەن، کە نیازێکی جدی نەبێ بۆ چارەسەرکردنیان و کەرکووک لەبەردەم تەعریبێکی تازەیە". 

 

دوای گەڕانەوەی لە کەرکووک، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان لەبارەی کەرکووک راپۆرتێک دەداتە سەرۆکایەتی ئەنجوومەنی وەزیران و بۆ سەرۆکی هەموو هێزە سیاسییەکانیشی دەنێرێ، بۆ ئەوەی بزانن دۆخی کەرکووک بەکوێ گەیشتووە.

 

سەبارەت بە هەڵبژاردنی پارێزگاری نۆێی کەرکووک، فەهمی بوورهان دەڵێت: "ئومێدمان هەیە لە دوای جەژن کۆبوونەوەی ئەنجوومەنی پارێزگای کەرکووک بکرێ، پرسی پارێزگاری کەرکووک یەکلابێتەوە. ئەوەی لە دیدارە و کۆبوونەوەکان تێبینیمان کردووە، پێکهاتەی عەرەبی وەک پێویست نایەتە پێش، بۆ گفتوگۆی جدی بەمەبەستی دانانی پارێزگاری کەرکووک".  

 

هەروەها راشیگەیاند، تورکمان-یش نیگەرانە؛ چونکە تورکمان هیچ سوودێکی لەم دواکەوتنە نەبینیوە، شەش مانگە راکان جبووری بە وەکالەت بە ئارەزووی خۆی و بێ چاودێریی کاردەکات و درێژە بەکارەکانی دەدات. گوتیشی "هیچ کەسێک لەم  دۆخە سوومەند نییە، جگە لە پێکهاتەی عەرەبی و بە دیاریکراوی پارتەکەی راکان جبووری و خودی راکان جبووری".