نشینگەی هەولێر لەبارەی دەستگیرکردنی ئەندامێکی کەجەکە: پاسپۆرتی ساختەی پێبووە

 

 

شەوی پێنجشەممە 10-05-2023 بەڕێوەبەرایەتیی نشینگەی پارێزگای هەولێر لە راگەیێندراوێکدا لەبارەی دەستگیرکردنی ئافرەتێک بە ناوی "عەزیمە ئارسون"ەوە روونکردنەوەیەکی بڵاوکردەوە و تێیدا هاتووە، "سەبارەت بە بابەتی راگیرانی کەسێک بە ناوی (عەزیمە ئارسون) لە فڕۆکەخانەی نێودەوڵەتیی هەولێر، بە هەموو لایەکی رادەگەیێنین کە ناوبراو هەوڵیداوە بە پاسپۆرت و بەڵگەنامەی ساختەی عێراقی لە رێگەی فڕۆکەخانەوە گەشت بکات، لەلایەن پۆلیسی نشینگەی فڕۆکەخانەوە بەڵگەنامە ساختەکانی ئاشکرا کراوە و پاش لیکۆلینەوە دەرکەوتووە لەلایەن دامەزراوە ئەمنییە فیدراڵییەکانی عێراقەوە داواکراوە و لەسەر داوای ئەوان راگیرا و لێکۆلینەوەی لەگەڵ کراوە."

 

سەبارەت بە چارەنووسی ئەو ئافرەتە، بەڕێوەبەرایەتییەکە دەڵێت، "رادەستی لایەنی داواکراو لە حکومەتی فیدراڵی دەکرێتەوە."

 

لە راگەیێندراوەکەدا ئاماژە بەوە نەدراوە ئەو ئافرەتە لە کوێ بووە و چۆن گەیشتووەتە هەولێر و ویستوویەتی بەرەو کوێ بڕوات.

 

عەزیمە ئارسۆن، ئەندامی کەجەکە "کۆما جڤاکێن کوردستانە"، لەدایکبووی ساڵی 1976ـە، نازناوی نەوشین بۆتانە و خەڵکی شاری سلۆپیی سەر بە پارێزگای شرنەخی باکووری کوردستانە، رۆژی 2ـی ئایار لەو کاتەی ویستوویەتی گەشت بۆ ئەوروپا بکات، دەستگیر کرا، ئەو ئافرەتە لەلایەن تورکیاوە داواکراوە.

 

کۆما جڤاکێن کوردستان - کەجەکەش لە راگەیێندراوێکدا ئەو ئافرەتەی بە "سیاسەتڤان" ناساندووە و رایگەیاندووە، ئارسۆن "نەخۆش بووە و کێشەی دڵی هەیە و ترسی ئەوە هەیە رادەستی تورکیا بکرێتەوە."