کوردستان
پێشوازیی سەفین دزەیی، بەرپرسی فەرمانگەی پەیوەندییەکانی دەرەوەی هەرێمی کوردستان لە خالد بن حمد ئەلسڵێتى، باڵیۆزی قەتەر لە عێراق
رووداو دیجیتاڵ
باڵیۆزی قەتەر لە عێراق رایگەیاند، کارەکانی کردنەوەی کۆنسوڵخانەی وڵاتەکەی لە هەرێمی کوردستان باش چوونەتە پێشەوە و بڕیارە بەمنزیکانە کۆنسوڵخانەکە بەشێوەیەکی فەرمی بکرێتەوە.
رۆژی چوارشەممە، 10-5-2023، خالد بن حمد ئەلسڵێتى، باڵیۆزی قەتەر لە عێراق سەردانی فەرمانگەی پەیوەندییەکانی دەرەوەی هەرێمی کوردستانی کرد و لەلایەن سەفین دەزیی، بەرپرسی فەرمانگەکە پێشوازی لێکرا.
باڵیۆزی قەتەر لە عێراق رایگەیاند: "قەتەر خۆشحاڵە بە پتەوکردنى پەیوەندییەکانی لەگەڵ حکومەتى هەرێمی کوردستان و بۆ ئەم مەبەستەش هەنگاوەکانى کردنەوەى کۆنسوڵخانەی گشتیى قەتەر لە هەرێمى کوردستان باش چوونەتە پێشەوە و بڕیارە بەم نزیکانە بەشێوەیەکى فەرمى لە شاری هەولێر بکرێتەوە."
سەفین دزەیی ئاماژەى بە گرنگیى برەودان بە پەیوەندییەکانی نێوان هەرێمى کوردستان و قەتەر کرد بەتایبەت دواى ئەوەى قەتەر بڕیاری دا کۆنسوڵگەریى گشتیى وڵاتەکەى لە هەرێمى کوردستان بکاتەوە. هاوکات ئامادەیی هەموو جۆرە هاوکارى و ئاسانکاریەیکى حکومەتى هەرێمى دەربڕى بۆ ئەم هەنگاوە.
کردنەوەی کۆنسوڵخانەی قەتەر لە هەرێمی کوردستان نوێ نییە و بۆ ساڵی 2021 دەگەڕێتەوە، بەڵام بە کاریگەریی بڵاوبوونەوەی ڤایرۆسی کۆرۆنا و رووداوەکانی ناوچەکە دواخرا.
تائێستا 41 کۆنسوڵخانە و نوێنەرایەتی و نووسینگەی کۆنسوڵخانە و بازرگانیی وڵاتان لە هەرێمی کوردستان کراونەتەوە. بە کردنەوەی کۆنسوڵخانەکەی، قەتەر دەبێتە هەشتەمین وڵاتی عەرەبی نوێنەرایەتیی خۆی لە هەولێر بکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ