پاشماوەی رووداوەکە لەسەر رێگەی سلێمانی - پێنجوێن. وێنە: رووداو
رووداو - پێنجوێن
بەهۆی سووتانی سێ بارهەڵگری پڕ سووتەمەنی لەسەر رێگەی پێنجوێن، شۆفێری یەکێک لە بارهەڵگرەکان سووتا و گیانی لەدەستدا، جگە لە سێ بارهەڵگرەکەش زیانی مادی بە 12 ئۆتۆمبێلی دیکە گەیشت.
فەرمان خەڵکی کرماشانی رۆژهەڵاتی کوردستانە؛ سێ رۆژ بوو بەهۆی تێکچوونی بارهەڵگرەکەیەوە، لە رێگەی سلێمانی - پێنجوێن مابووەوە، کەچی ئەو رووداوە هاتووچۆ بووە هۆی گڕگرتنی بارهەڵگرەکەی و سووتەمەنییەکەی ناوی.
فەرمان عەلی، شۆفێری یەکێک لە تانکەرە سووتاوەکانە و خەڵکی کرماشانە، دەڵێت، "لە کەنار شەقامەکە وەستابووین، بڕیار بوو چاکی بکەین، هەموو شتەکانمان بۆ هێنابوو کە ئەمڕۆ فیتەرەکە بێت، پێکدادان بوو لە پشتی ئێمەوە، دواتریش لە بەردەمماندا ئەمە بوو، قسمەت بوو هەمووی چوو بە ئاسماندا. 15 ساڵە ژیانمان لەسەر ئەم کارەیە. خۆشم لە کاتی ئاگرکوژاندنەوەکە دوو جار کەوتم بە زەویدا."
هیوا شۆفێری بارهەڵگرە و یەکێک لە زیانلێکەوتووانی رووداوەکەی شەوی پێنجشەممەیە؛ دەڵێت، ویستوویەتی شۆفێری بارهەڵگرەکە رزگار بکات، کەچی ماڵی خۆیشی تێیداچوو.
هیوا محەممەد، شۆفێری بارهەڵگر گوتی، "چواریمان دانابوو جادە چۆڵ بێت و بڕۆین. لە پشتمەوە دەنگێکی بەرز هات. ئەم بارهەڵگرە لەگەڵ دووانی دیکە گرپە بەرزبوویەوە، زۆر هەوڵم دا بارهەڵگرەکەم رزگار بکەم، دابەزیم بچم بۆلای شۆفێرەکە، هێشتا مابوو، بەڵام زۆر هاوارم کرد، کەس نەهات بەدەممانەوە، منیش بە ناچاری ئەوەی خۆشم و هەموویم جێهێشت و رۆشتم."
بە گوتەی هاتووچۆی سەیدسادق، لەو رووداوەدا 12 ئۆتۆمبێل زیانیان پێگەیشتووە، لەنێویشیاندا سێ بارهەڵگریان سووتاون.
مەسعود حەسەن، رێگەپێدراوی هاتووچۆی سەیدسادق گوتی، "کاژێر 11:30ی شەو تیمەکانمان هاتوونەتە ئێرە، کەسێک لەنێو تەنکەرەکە بوو، تیمی تەندروستی هاتن دەریانهێنا، بەڵام بەداخەوە گیانی لەدەستدابوو."
لەو رووداوەدا، شۆفێری بارهەڵگرێک کە بە گوتەی هاتووچۆ، تەمەنی 22 ساڵانە و خەڵکی گوندی سێماڵەی پێنجوێنە، گیانی لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ