هونەرمەند محەممەد تەها ئاکرەیی تووشی رووداوی هاتووچۆ بوو؛ 'قاچ و دەستێکی شکاوە'

 

رووداوەکە شەوی پێنجشەممە، 09-01-2025، لەسەر رێگەی دهۆک- ئاکرێ روویداوە و بەگوێرەی زانیارییەکانی نایف رەمەزان، پەیامنێری تۆڕی میدیایی رووداو، ئۆتۆمبێلەکەی محەممەد تەها ئاکرەیی لەگەڵ بارهەڵگرێک پێکیانداداوە.

 

ئەو هونەرمەندە ئێستا لە نەخۆشخانەی فریاکەوتنی دهۆک چارەسەر وەردەگرێت. ئەڤین حوسێن، سەرۆکی لقی دهۆکی سەندیکای هونەرمەندانی کوردستان لە نەخۆشخانە قسەی بۆ رووداو کرد و گوتی، بەهۆی رووداوەکەوە قاچ و دەستی لە دوو یان سێ شوێن شکاون.''

 

سەرۆکی لقی دهۆکی سەندیکای هونەرمەندانی کوردستان گوتیشی، محەممەد تەها ئاکرەیی پێویستی بە دوو یان سێ نەشتەرگەری هەیە، بەڵام پێویستە چاوەڕێ بن پشکنینەکانی تایبەت بە هەناوی بۆ بکرێت، بۆ ئەوەی دڵنیا ببنەوە کە نەشتەرگەرییەکە کێشەی تەندروستی بۆ دروست دەکات یان نا.

 

محەممەد تەها ئاکرەیی، لە ئاکرێی باشووری کوردستان لە دایکبووە، بۆ ماوەیەک لە سوێد ژیاوە و ئێستا لە کوردستان دەژی و خاوەنی کۆمەڵێک ئەلبووم و ڤیدیۆکلیپێکە، بەرهەمە بەناوبانگەکانی بریتین لە نەورۆز، گەلی بولبولا، کوڕینی، خانا دانا و کەچێ جانێ.