شارەوانیی سلێمانی سێ هەزار سەگی بێلانە لە شێڵتەرێکدا کۆدەکاتەوە

وەرگرتنی سەگ و ئاژەڵە بێلانەکانی دیکە بۆ ئەو شوێنەی تایبەتکراوە بۆیان، لە رۆژی دووشەممە 10-1-2022ـەوە دەستیپێکردووە. ئاکۆ عەلی، جێگری سەرۆکی شارەوانیی سلێمانی بە تۆڕی میدیایی رووداوی راگەیاند، خۆیان سەگ و ئاژەڵە بێلانەکان لەنێو شاردا کۆدەکەنەوە و هەر هاووڵاتییەکیش سەگیان بۆ ببات لێی وەردەگرن.

 

ئاکۆ عەلی گوتی، "پرۆژەکە لە چوار بەش پێکهاتووە، بەشێکیان سەگە نێرەکانی لێ دادەنێین، بەشێکیشیان بۆ سەگی مێ، بەشێکیشیان بۆ تووتکەکان و ئەوەی دیکەش بۆ سەگی هاوشار، ئەگەر پێویست بکات بەینەکانیان پەرژین دەکەین، بۆ هەموو بەشەکان کەپر و دیوارمان بۆ دروستکردوون و تیممان داناوە بۆ پاککردنەوەی شوێنەکە بۆ هێنانی خواردن."

شارەوانیی سلێمانی لەگەڵ پاراستنی سەگ و ئاژەڵە بێلانەکانی دیکەدا، دەیەوێت هاووڵاتییانیش بپارێزێت لە هەر  مەترسییەک کە ئاژەڵە بێلانەکان دروستیبکەن. بۆ ئەو مەبەستە شارەوانی خۆی رۆژانە بەئۆتۆمبێلی تایبەت بە گەڕەکانی ناو سلێمانی دەگەڕێت بۆ بردنی سەگە بێلانەکان بۆ ماڵە نوێکەیان. بڕیارە سێ هەزار سەگ لەو شوێنە وەربگیرێت.

 

ئاکۆ عەلی باسی لەوەشکرد، "مەرجی ئێمە ئەوەیە کە تەنیا ئەو سەگانە وەردەگرین کە هی ناو سلێمانین نەک قەزا و ناحیەکان، چونکە ئەوانیش دەتوانن خۆیان شوێنێک دروست بکەن، هەر هاونیشتمانییەکیش بتوانێت خۆی سەگمان بۆ بێنێت ئێمە دوو بۆ سێ هەزار دیناری پێدەدەین، بەڵام بۆ سەگی گەورە نەک بەچکە."

ئاکۆ عەلی دەڵێت، شارەوانیی سلێمانی سەرپەرشتیی شوێنەکە دەکات کە لە زەوییەکدا لانەیان بۆ دروستکراوە، خۆراکیان پێدەدرێت و چاودێریی دەکرێن، سەرجەم تێچووەکەشی لە ئەستۆی بەڕێوەبەرایەتییەکەیان دەبێت.

 

د. ئاری سەلاحەدین، بەڕێوەبەری ڤێتێرنەریی سلێمانی بە رووداوی گوت، "تیمەکانی ئێمە دێنە ئێرە بۆ ئەنجامدانی کاری ڤاکسینکردن و چارەسەرکردن، هەر ئاژەڵێک پێویستی بە چارەسەرکردن یان نەشتەرگەری هەبێت بۆی ئەنجام دەدەین جا هەر جۆرە نەشتەرگەرییەک بێت."

 

فەرمان عەزیز، ئەندامی رێکخراوی پاکۆ باسی لەوە کرد، "ئێمە هەموومان لێرە خۆبەخشین، ئەوەی بتوانین ئەنجامی دەدەین، بەڵام بەڕاستی هەموو شتێک بەئێمە ئەنجام نادرێت، پێویستە کارمەند و پزیشکی تایبەت لێرە دابنرێت و لەیەکدی جیابکرێنەوە بۆ ئەوەی سەگەکان لەگەڵ یەکدی شەڕ نەکەن و لێرە پارێزراو بن."

لە شار و شارۆچکەکانی هەرێمی کوردستان، چەندین جۆر ئاژەڵی بێلانە لە گەڕەکەکاندا هەن، بەتایبەت سەگ و پشیلە، لە ساڵانی رابردوودا لە هەندێک شوێنی جیاواز بەڕێگەی جیاجیا سەگەکان لەنێودەبران، ئەوەش ناڕەزایی تووندی بەشێکی هاونیشتمانیان، ژینگەدۆست و ئاژەڵدۆستانی لێکەوتەوە.