رووداو دیجیتاڵ
بەهۆی بوونی بارەگایەکی سوپای عێراق لە گوندەکەیان، هاونیشتمانییانی گوندێکی قەزای خورماتوو، زیاتر لە 7 ساڵە ناتوانن بگەڕێنەوە گوندەکەیان.
لە دوای رووداوەکانی ئۆکتۆبەری 2017، ژمارەیەکی زۆر کوردی قەزای خورماتوو ئاوارە بوون، لەوانە دانیشتووانی گوندی خدر وەلی،کە 280 ماڵن، ئەوان گوندەکەیان بەتەواوی چۆڵکرد و ئاوارە بوون، تاوەکو ئێستاش ناتوانن بگەڕێنەوە.
کەریم شوکر، نوێنەری قەزای خورماتوو لە پەرلەمانی عێراق، ئەمڕۆ دووشەممە (9-12-2024) بە تۆڕی میدیایی رووداوی گوت، "دوای رووداوکانی 16ـی ئۆکتۆبەر، بارەگای فەوجێکی سوپای عێراق لە گوندی خدر وەلی دروستکراوە، ئەمە گرفتی بۆ دانیشتووانەکەی دروستکردووە و بەهۆیەوە ناتوانن بگەڕێنەوە."
کەریم شوکر، کە هاوکات جێگری سەرۆکی فراکسیۆنی یەکێتیی نیشتمانیی کوردستانە لە پەرلەمانی عێراق، دەڵێ هەوڵەکانی خۆیان خستووەتەگەڕ بۆ ئەوەی ئەو بارەگایە لە گوندەکە نەمێنێت و چۆڵی بکەن، تاوەکو خەڵکەکە بگەڕێنەوەی زێدی خۆیان.
کەریم شوکر باس لەوە دەکات، لەگەڵ عەلی مالیکی، فەرماندەی ئۆپەراسیۆنەکانی رۆژهەڵاتی پارێزگای سەلاحەدین و بەرپرسانی دیکەی سەربازی و کارگێڕی، قسەیان کردووە بۆ چارەسەرکردنی ئەو پرسە و هەوڵەکانیان بەردەوامە.
قەزای خورماتوو یەکێکە لە ناوچە دابڕێنراوەکانی باشووری کوردستان و لەڕووی کارگێڕییەوە سەر بە پارێزگای سەڵاحەدینە. لە رووداوەکانی 16ـی ئۆکتۆبەردا بەشێکی زۆری خانووی هاونیشتمانیان لەلایەن گرووپە چەکدارەکانەوە سووتێندران و تەقێندرانەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ