رووداو دیجیتاڵ
گەنجێکی کورد بەشداری لە (کۆڕبەندی نەتەوە یەکگرتووەکان بۆ بەڕێوەبردنی ئینتەرنێت)دا دەکات، کە لە ژاپۆن بە سەرپەرشتیی سکرتێری گشتیی نەتەوە یەکگرتووەکان بەڕێوەدەچێت.
رۆژی 07-10-2023 کۆڕبەندی نەتەوە یەکگرتووەکان بۆ بەڕێوەبردنی ئینتەرنێت لە شاری کیۆتۆی ژاپۆن بە سەرپەرشتیی ئەنتۆنیۆ گۆتێرێز، سکرتێری گشتیی نەتەوە یەکگرتووەکان دەستیپێکرد. رەمەزان ئیسماعیل، گەنجێکی شاری هەولێرە و لەلایەن نەتەوە یەکگرتووەکانەوە وەکو تاکە نوێنەری عێراق بانگهێشت کراوە.
رەمەزان ئیسماعیل لە شاری کیۆتۆی ژاپۆنەوە قسەی بۆ رووداو کرد و گوتی، "بە فەرمی لەلایەن نەتەوە یەکگرتووەکانەوە بانگهێشتی کۆڕبەندەکە کراوم و نوێنەرایەتیی عێراق و هەرێمی کوردستان دەکەم."
رەمەزان ئیسماعیل گوتیشی، "کۆڕبەندەکە بە سەرپەرشتیی راستەوخۆی ئەنتۆنیۆ گۆتێرێز، سکرتێری گشتیی نەتەوە یەکگرتووەکان و چاودێریی فومیۆ کیشیدا، سەرۆکوەزیرانی ژاپۆن بەڕێوەدەچێت و چەندین سەرۆک، سەرکردە و چالاکڤان لە وڵاتانی جیهانەوە تێیدا بەشدارن."
ئەو گەنجە کوردە ئاماژەی بەوەش کرد، "لەسەر ئاستی عێراق و کوردستان تەنیا من بەشدارم، جگە لەوە دەیان گەنج، سەرۆک، وەزیر و بەرپرسی وڵاتانی یەکێتیی ئەوروپا بەشداریی کۆڕبەندەکە دەکەن."
رەمەزان ئیسماعیل شێروانی دانیشووی شاری هەولێرە و لە ساڵی 2019وە لەلایەن نەتەوە یەکگرتووەکانەوە بە باڵیۆزی گەنجانی جیهانی بۆ ئاشتی دەستنیشان کراوە.
18مین کۆڕبەندی نەتەوە یەکگرتووەکان بۆ بەڕێوەبردنی ئینتەرنێت لە شاری کیۆتۆی ژاپۆن بەڕێوەدەچێت و تاوەکو 12ی تشرینی یەکەم بەردەوام دەبێت.
کۆڕبەندی بەڕێوەبردنی ئینتەرنێت (Internet Governance Forum) گفتوگۆ لەبارەی سیاسەتی بەڕێوەبردنی ئینتەرنێت و کێشەکانی دەکات. نوێنەری حکومەتی وڵاتان، چالاکڤانان، شارەزایانی IT و ئینتەرنێت تێیدا بەشدار دەبن.
کۆڕبەندی بەڕێوەبردنی ئینتەرنێت لە ساڵی 2006 لەلایەن سکرتێری گشتیی نەتەوە یەکگرتووەکانەوە بە فەرمی راگەیێندرا و یەکەم کۆڕبەندیشی لە مانگی تشرینی یەکەمی 2006دا بەست و لەو کاتەوە تاوەکو ئێستا ساڵانە کۆڕبەندەکە بەڕێوەدەچێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ