سەرۆک بارزانی بۆ شاندەکەی بەغدا: ناکرێت خەبات و قوربانیدانی کوردستان لە مووچەدا بچووکبکرێتەوە

 

رۆژی دووشەممە 9ی ئەیلوولی 2024 لە سەلاحەدین سەرۆك مەسعود بارزانی پێشوازی لە شاندێكی باڵای حكومەتی عێراقی كرد و گفتوگۆیان لەبارەی چەند پرسێکەوە کرد.

 

بەپێی راگەیێندراوی بارەگای بارزانی، سەرۆک بارزانی ئەوەی بە شاندەکە گوتووە، "لەدوای ساڵی 2003 ئەو چاوەڕوانییە هەبوو كە عێراقێكی تازە بنیات بنرێت كە ببێتە نموونەی پێكەوەژیان و شەراكەت و دیموكراسی و فرەیی لە ناوچەكەدا."

 

سەرۆک بارزانی ئەوەشی دووپات كردووەتەوە، خەباتی گەلی كوردستان بۆ چەسپاندنی شەراكەت و مافەكانیەتی، "ناكرێت لەبری رێزگرتن لە داواكانی گەلی كوردستان و قەرەبووی ئەنفال و كیمیاباران، هەوڵی ئەوە بدرێت دۆزێكی مێژوویی و خەبات و قوربانیدانی بێهەژماری كوردستان لە بابەتی مووچەدا بچووك بكرێتەوە یانیش هەوڵی لێكترازاندنی هەرێمی كوردستان بدرێت."

 

شاندی میوان، وەکو لە راگەیێندراوەکەی بارەگای بارزانیدا خراوەتەڕوو، "جەختیان لەوە كردەوە، چاوپێكەوتن و كۆبوونەوەكانیان لەگەڵ حكومەتی هەرێمی کوردستان سوودبەخش بووە و مەبەستیانە هەموو لایەك لە كەشێكی پڕ لە متمانە و بە تێڕوانینێكی شەفاف و بنیاتنەر بگەنە لێكتێگەیشتنێكی تەواو لەپێناو چارەسەركردنی كێشەكان و لابردنی كۆسپەكان."

 

سەرۆك بارزانی لەو کۆبوونەوەدا جەختی لەوەش كردووەتەوە، "باشترین رێگە بۆ نەهێشتنی كێشەكان، گرتنەبەری شێوازی لێكتێگەیشتن و دیالۆگی نێوان حكومەتی عێراقی فیدراڵ و حكومەتی هەرێمی كوردستانە." ئاماژەشی بەوە داوە، "بۆ چارەسەركردنی كێشەكان، پێویستە هەموومان بۆ دەستوور بگەڕێینەوە و لەگەڵ ئەوەشدا پابەندی ئەو رێككەوتنە سیاسییە بین كە لایەنەكانی هاوپەیمانێتیی ئیدارەی دەوڵەت لەسەری رێككەوتوون."

 

هاوکات سەرۆك بارزانی گوتووشیەتی، بۆ سەرخستنی پرۆسەی دیالۆگ و چارەسەركردنی كێشەكان، لەپاڵ پابەندبوون بە دەستوور و رێككەوتنە سیاسییەكان، پێویستە نیازپاكی و ئیرادەیەكی راستەقینە بۆ چارەسەری كێشەكان هەبێت.

 

شاندەکەی حکومەتی عێراق پێكهاتبوو لە فوئاد حوسێن، جێگری سەرۆكوەزیرانی عێراق و سەرۆكی ئەنجوومەنی وەزاریی ئابووری؛ محەممەد عەلی تەمیم جێگری سەرۆكوەزیرانی عێراق و وەزیری پلاندانان؛ تەیف سامی، وەزیری دارایی عێراق؛ حەمید نەعیم غزی، سكرتێری گشتیی ئەنجوومەنی وەزیرانی عێراق؛ عەلی موحسین ئیسماعیل، پارێزگاری بانكی ناوەندیی عێراق و ژمارەیەك لە بەرپرسانی حكومەتی عێراقی لە وەزارەتەكانی دەرەوە، پلاندانان، دارایی، نەوت، بازرگانی و پیشەسازی و كانزاكان، كشتوكاڵ و كار و كاروباری كۆمەڵایەتی و هەروەها سكرتاریەتی ئەنجوومەنی وەزیرانی عێراق و بانكی ناوەندیی عێراق و دەستەی ئەوراقە داراییەكانی عێراق.

 

لەو دیدارەدا شاندێكی باڵای حكومەتی هەرێمی كوردستانیش ئامادە بوون، كە پێكهاتبوون لە وەزیری ناوخۆ، وەزیری دارایی، سەرۆكی دیوانی ئەنجوومەنی وەزیران و ژمارەیەكی دیکە لە بەرپرسانی حكومەتی هەرێمی كوردستان.